ഇറാൻ റെവല്യൂഷണറി ഗാർഡ്സിന്റെ (IRGC) പുതിയ കമാൻഡറായി ജനറൽ അഹമ്മദ് വാഹിദിയെ നിയമിച്ചു. മുൻ മേധാവി മുഹമ്മദ് ഫഖ്പൂർ കൊല്ലപ്പെട്ടതിനെത്തുടർന്നാണ് ഈ നിർണ്ണായക നിയമനം എന്ന് ഇറാൻ ഔദ്യോഗിക മാധ്യമങ്ങൾ റിപ്പോർട്ട് ചെയ്തു. 2025 ഒക്ടോബറിൽ ഇറാന്റെ സായുധ സേനാ ജനറൽ സ്റ്റാഫിന്റെ ഡെപ്യൂട്ടി ചീഫായി നിയമിതനായ വാഹിദി, നേരത്തെ പ്രതിരോധ മന്ത്രിയായും ആഭ്യന്തര മന്ത്രിയായും സേവനമനുഷ്ഠിച്ചിട്ടുണ്ട്.
യുഎസും ഇസ്രായേലും സംയുക്തമായി നടത്തിയ ‘ഓപ്പറേഷൻ എപ്പിക് ഫ്യൂറി’ എന്ന വ്യോമാക്രമണത്തിൽ പരമോന്നത നേതാവ് ആയത്തുള്ള അലി ഖമേനിയും ഐആർജിസി മേധാവി മുഹമ്മദ് പക്പൂറും കൊല്ലപ്പെട്ടിരുന്നു. പിന്നാലെ രാജ്യം അതീവ ഗുരുതരമായ ഭരണപ്രതിസന്ധി നേരിടുന്ന ഘട്ടത്തിലാണ് ഖുദ്സ് ഫോഴ്സിന്റെ മുൻ കമാൻഡർ കൂടിയായ വാഹിദി ചുമതലയേൽക്കുന്നത്.
1994ൽ ബ്യൂണസ് അയേഴ്സിലെ എഎംഐഎ (AMIA) ജൂത കമ്മ്യൂണിറ്റി സെന്ററിലുണ്ടായ ബോംബാക്രമണത്തിൽ പങ്കുണ്ടെന്ന് ആരോപിച്ച് 2007 മുതൽ അഹമ്മദ് വാഹിദിക്കെതിരെ ഇന്റർപോൾ റെഡ് നോട്ടീസ് നിലവിലുണ്ട്. 85 പേർ കൊല്ലപ്പെടുകയും മുന്നൂറോളം പേർക്ക് പരിക്കേൽക്കുകയും ചെയ്ത ആ സ്ഫോടനത്തിൽ അർജന്റീനയുടെ അഭ്യർത്ഥനപ്രകാരമാണ് ഇന്റർപോൾ നടപടി സ്വീകരിച്ചത്.