സമൂഹമാധ്യമങ്ങളിലൂടെ നിരവധി രസകരമായ വീഡിയോകള്‍ പുറത്ത് വരാറുണ്ട്. അത്തരത്തില്‍ ഏറെ ശ്രദ്ധിക്കെപ്പെട്ട ഒരു വീഡിയോ ആയിരുന്നു ഉഴവൂർ ചക്കാലപടവിൽ അന്ന ചക്കാലപടവും ഭർത്താവ് തോമസുമായുള്ള സംഭാഷണം. ‘‘കൊടയല്ല വടി’- വീട്ടിലെ തെങ്ങിന് വളമിടുന്ന കാര്യം കേൾവിക്കുറവുള്ള ഭർത്താവിനോട് പലയാവർത്തി പറഞ്ഞിട്ടും കേൾക്കാതെ വരുമ്പോൾ തൊണ്ണൂറുകാരി ഭാര്യയുടെ ദേഷ്യത്തോടെയുള്ള പ്രതികരണമായിരുന്നു വീഡിയോയില്‍. രണ്ട് കൊല്ലം മുമ്പാണ് വീഡിയോ യൂട്യുബിൽ എത്തിയത്.
ആ യൂട്യൂബ് രംഗത്തിലെ സംഭാഷണം ഇങ്ങനെ ‘തൈയുടെ ചോട്ടിലേ വളം മേടിച്ചിടണം …വളം’’ എന്ന് അന്ന. ഭാര്യ എന്തോ പറയുന്നുണ്ടെന്ന് മനസിലാക്കിയ തോമസ് ശ്രദ്ധാപൂർവം ശ്രദ്ധിക്കുന്നുണ്ടെങ്കിലും കേൾക്കാൻ കഴിയുന്നില്ല. അന്ന പലയാവർത്തി പറയുമ്പോൾ തോമസ് വളരെ ശാന്തനായി അവസാനം ചോദിക്കുന്നു ‘‘കൊടയോ’’. അത് കേട്ടതും സ്വാഭാവികമായുണ്ടായ ദേഷ്യത്തിന് പുറത്ത് അന്ന പ്രതികരിച്ചതാണ് ‘‘കൊടയല്ല വടി’. ആ മാസ് മറുപടി കേട്ട് ചിരിക്കാത്ത മലയാളികൾ ചുരുക്കമായിരിക്കും.
അത്രയും സ്വഭാവികമായിട്ടാണ് ആ അമ്മയുടെ പ്രതികരണമെന്ന് അയൽവാസിയായ സൈമൺ പരപ്പനാട് പറയുന്നു. പലവട്ടം താനടക്കം പലരും ഈ രംഗം അന്നച്ചേട്ടത്തിയേയും അപ്പാപ്പനേയും കാണിച്ചിട്ടുണ്ട്. അപ്പോഴൊക്കെ അന്നച്ചേടത്തി പറയും ‘‘മകളുടെ മകൾ പറ്റിച്ച പണി’’യായിരുന്നെന്ന്. ഈ രംഗം പിന്നീട് കണ്ട് തോമസും നടൻ ജഗതി ശ്രീകുമാർ പോലും ചിരിച്ചു. ജഗതി ചിരിക്കുന്ന വീഡിയോ കണ്ട് അന്നച്ചേട്ടത്തിയും കണ്ടിരുന്നു.
കഴിഞ്ഞ ദിവസം വരെ വലിയ ആരോഗ്യപ്രശ്നങ്ങളുണ്ടായിരുന്നില്ല. പിന്നെ ചെറിയ ചുമയും ശ്വാസംമുട്ടലുമാണ് ആരോഗ്യം വഷളാക്കിയത്. വെള്ളിയാഴ്ചയാണ് മരണം സംഭവിച്ചത്.
English Summary: Anna the lady in the viral video passed away
You may also like this video
