നിങ്ങളുടെ പിന്തുണ അതിശയിപ്പിച്ചു; കേരളത്തിന് നന്ദി പറഞ്ഞ് അര്‍ജന്റീന

കേരളത്തിന്റെ ഫുട്ബാൾ ആവേശത്തിന് നന്ദി രേഖപ്പെടുത്തി അർജന്റീന ഫുട്ബോള്‍ അസോസിയേഷന്‍. ഒഫീഷ്യൽ ട്വിറ്റർ അക്കൗണ്ടിലൂടെയായിരുന്നു അർജന്റീന ആരാധകരോടുള്ള നന്ദി രേഖപ്പെടുത്തിയത്. ബംഗ്ലാദേശ്, ഇന്ത്യ, പാകിസ്താൻ എന്നിവിടങ്ങളിലെ ആരാധകർക്ക് നന്ദി അറിയിക്കുന്നതിനൊപ്പം കേരളത്തെ പ്രത്യേകം പരാമർശിക്കുകയായിരുന്നു.

‘താങ്ക് യു ബംഗ്ലാദേശ്. താങ്ക് യു കേരള, ഇന്ത്യ, പാകിസ്താൻ. നിങ്ങളുടെ പിന്തുണ അതിശയിപ്പിച്ചു’ ‑അർജന്റീന ടീം ട്വീറ്റ് ചെയ്തു. ബംഗ്ലാദേശിൽ നിന്നുള്ള വിജയാഘോഷ വീഡിയോയും ട്വീറ്റ് ചെയ്തിട്ടുണ്ട്. കേരളത്തിന്റെ ഫുട്ബാൾ ആവേശം ഇത്തവണയും അന്താരാഷ്ട്ര തലത്തിൽ ശ്രദ്ധിക്കപ്പെട്ടിരുന്നു. കോഴിക്കോട് പുള്ളാവൂർ പുഴയിൽ മെസ്സിയുടെ കൂറ്റൻ കട്ടൗട്ട് സ്ഥാപിച്ചത് നേരത്തെ അർജന്റീന ടീം സമൂഹമാധ്യമങ്ങളിൽ പങ്കുവെച്ചിരുന്നു.