ഏഷ്യൻ ഷൂട്ടിങ് ചാമ്പ്യൻഷിപ്പിൽ പുരുഷന്മാരുടെ 50 മീറ്റർ റൈഫിൾ 3 പൊസിഷൻസ് ഇനത്തിൽ ഇന്ത്യ മെഡലുകൾ തൂത്തുവാരി. ഫൈനലിലെ അവസാന ഷോട്ടിലൂടെ സഹതാരം നീരജ് കുമാറിനെ മറികടന്ന് ഐശ്വരി പ്രതാപ് സിങ് തോമർ സ്വർണ മെഡൽ സ്വന്തമാക്കി. 362 പോയിന്റ് നേടി തോമർ ലോക റെക്കോഡ് സ്ഥാപിച്ചു.
വെങ്കലം നേടിയ അഖിൽ ഷിയോറൻ (343.5) പുറത്തായതിന് ശേഷം, അവസാന ഷോട്ടിനായി രണ്ട് ഇന്ത്യക്കാരും തയ്യാറെടുക്കുമ്പോൾ തോമറിനേക്കാൾ 0.2 പോയിന്റിന്റെ നേരിയ ലീഡ് കുമാറിനുണ്ടായിരുന്നു. 361.8 പോയിന്റോടെയാണ് കുമാർ വെള്ളി നേടിയത്. യോഗ്യതാ റൗണ്ടിൽ ആകെ 1769 പോയിന്റ് നേടി ഇന്ത്യൻ സഖ്യം ടീം ഇനത്തിലും സ്വർണം ഉറപ്പിച്ചു. ജപ്പാൻ (1754), കസാക്കിസ്ഥാൻ (1748) എന്നിവർ യഥാക്രമം വെള്ളി, വെങ്കല മെഡലുകൾ സ്വന്തമാക്കി.