പീഡനശ്രമം: ട്രാവൽ വ്ളോഗർക്കെതിരെ കേസ് 

സത്രീത്വത്തെ അപമാനിച്ചെന്ന പരാതിയിൽ ‘മല്ലു ട്രാവലർ’ എന്നപേരിൽ അറിയപ്പെടുന്ന ട്രാവൽ വ്ളോഗർ കണ്ണൂർ ഇരിട്ടി സ്വദേശി ഷാക്കിർ സുബ്ഹാനെതിരെ പൊലീസ് കേസെടുത്തു.

സൗദി അറേബ്യൻ സ്വദേശിനിയുടെ പരാതിയിലാണ് എറണാകുളം സെൻട്രൽ പൊലീസ് കേസെടുത്തത്. അശ്ലീല ചുവയോടെ സംസാരിച്ചെന്നും കടന്നു പിടിക്കാൻ ശ്രമിച്ചെന്നുമാണ് യുവതി പരാതിയിൽ പറയുന്നത്.

ബുധനാഴ്ച എറണാകുളത്തെ ഹോട്ടലിൽ ഷാക്കിറുമായി നടന്ന അഭിമുഖത്തിനിടെയിലായിരുന്നു കേസിനാസ്പദമായ സംഭവം. അഭിമുഖത്തിനായി കൊച്ചിയിൽ എത്തിയതായിരുന്നു ഇവർ. മലയാളിയായ പ്രതിശ്രുതവരനും കൂടെയുണ്ടായിരുന്നു.

അഭിമുഖത്തിനിടെ പ്രതിശ്രുതവരൻ പുറത്തുപോയ സമയത്ത് ഹോട്ടൽ മുറിയിൽ വച്ച് ഷാക്കിർ മോശമായി പെരുമാറുകയായിരുന്നുവെന്നാണ് പരാതി. ഷാക്കിർ നിലവിൽ വിദേശത്താണെന്ന് പൊലീസ് പറഞ്ഞു. വരും ദിവസങ്ങളിൽ തുടർനടപടികൾ സ്വീകരിക്കുമെന്നു പൊലീസ് അറിയിച്ചു. എന്നാൽ പരാതി വ്യാജമാണെന്നും മതിയായ തെളിവുകൾ കൊണ്ട് അതിനെ നേരിടുമെന്നും ഷാക്കിർ സമൂഹമാധ്യമത്തിൽ കുറിച്ചു.