ബോണ്ടി ബീച്ച് കൂട്ടക്കൊല; വിദ്വേഷ പ്രസംഗങ്ങൾക്കെതിരെ നിയമങ്ങൾ വിപുലീകരിക്കാനൊരുങ്ങി ഓസ്ട്രേലിയ

ബോണ്ടി ബീച്ച് കൂട്ടക്കൊലയ്ക്ക് പിന്നാലെ വിദ്വേഷ പ്രസംഗ നിയമങ്ങൾ വിപുലീകരിക്കാനൊരുങ്ങി ഓസ്ട്രേലിയ. സെമിറ്റിക് വിരുദ്ധതയും തീവ്രവാദവും പരിഹരിക്കുന്നതിന് കൂടുതൽ നടപടികള്‍ സ്വീകരിക്കണമെന്നാവശ്യപ്പെട്ട് പ്രധാനമന്ത്രി ആന്റണി അല്‍ബനീസിനുമേല്‍ സമ്മര്‍ദം ശക്തമായിരുന്നു. ഇതിനു പിന്നാലെയാണ് നിയമത്തില്‍ വിപുലമായ മാറ്റങ്ങള്‍ പ്രഖ്യാപിക്കാന്‍ സര്‍ക്കാര്‍ ഒരുങ്ങുന്നത്.
വിദ്വേഷ പ്രസംഗവും അക്രമവും പ്രോത്സാഹിപ്പിക്കുന്ന ആളുകളിൽ നിന്ന് കുറ്റം ചുമത്തുന്നത് എളുപ്പമാക്കുന്ന നിയമനിർമ്മാണം കൊണ്ടുവരാനും പിഴകൾ വർദ്ധിപ്പിക്കാനും വിദ്വേഷ പ്രസംഗത്തിൽ ഏർപ്പെടുന്ന നേതാക്കളെ ലക്ഷ്യമിടുന്ന സംഘടനകളെ ലക്ഷ്യമിടുന്നതിനുള്ള ഒരു സംവിധാനം വികസിപ്പിക്കാനും സർക്കാർ ശ്രമിക്കുമെന്ന് അല്‍ബനീസ് വ്യക്തമാക്കി. പുതിയ അഞ്ച് ഇന പദ്ധതി പ്രകാരം വിദ്വേഷവും ഭിന്നതയും പ്രചരിപ്പിക്കുന്നവരുടെ വിസ റദ്ദാക്കാന്‍ ആഭ്യന്തര മന്ത്രിക്ക് അധികാരം നൽകും.
അതേസമയം, ആന്റിസെമിറ്റിക് പ്രവർത്തനങ്ങൾ പിന്തുണയ്ക്കുന്ന കലാ-ഗവേഷണ പദ്ധതികൾക്കുള്ള ധനസഹായം നിർത്തലാക്കുകയോ തടയുകയോ ചെയ്യുക, തീവ്രവാദ പ്രവർത്തനങ്ങളിൽ ഏർപ്പെടുന്ന ഇരട്ട പൗരന്മാരുടെ പൗരത്വം പിൻവലിക്കുക എന്ന ആശയം പുനരുജ്ജീവിപ്പിക്കുക , ഗാസ ഉൾപ്പെടെ തെരഞ്ഞെടുക്കപ്പെട്ട സ്ഥലങ്ങളില്‍ നിന്നുള്ളവര്‍ക്ക് വിസ നൽകുന്നത് താൽക്കാലികമായി നിർത്തുക എന്നിവയാണ് പ്രതിപക്ഷം മുന്നോട്ടുവയ്ക്കുന്ന പദ്ധതി.
സിഡ്നി ബോണ്ടി ബീച്ചിൽ ഞായറാഴ്ച രണ്ട് പേർ ചേർന്ന് നടത്തിയ വെടിവെപ്പിൽ ഒരു അക്രമി ഉൾപ്പെടെ 16 പേരാണ് കൊല്ലപ്പെട്ടത്. 40 ൽ അധികം പേർ ചികിത്സയിലാണ്. സാജിദ് അക്രം, മകൻ നവീദ് അക്രം എന്നിവരാണ് വെടിവയ്പ് നടത്തിയത്. സംഭവത്തിനു പിന്നാലെ പൊലീസുമായുള്ള ഏറ്റുമുട്ടലിൽ സാജിദ് അക്രം കൊല്ലപ്പെട്ടു. ഗുരുതരമായി പരിക്കേറ്റ നവീദ് ആശുപത്രിയിലാണ്. അക്രമികൾ 50 മുതൽ 100 ​​തവണവരെ വെടിയുതിര്‍ത്തു. ഏകദേശം 10 മിനിറ്റ് വെടിവയ്പ്പ് തുടർന്നുവെന്ന് ദൃക്‌സാക്ഷികൾ പറഞ്ഞു. ആക്രമണത്തിന് ഇരയായവരിൽ 10 വയസുള്ള ഒരു പെൺകുട്ടിയും 87 വയസുള്ള വൃദ്ധനും ഉൾപ്പെടുന്നു.