ബ്രഹ്മപുരം തീപിടിത്തത്തില്‍ കൊച്ചി മുന്‍സിപ്പല്‍ കോര്പറേഷന് 100 കോടി പിഴ ചുമത്തി. മാലിന്യം കൈകാര്യം ചെയ്യുന്നതില്‍ കോര്പറേഷന് ഗുരുതര കൃത്യവിലോപമാണ് വരുത്തിയതെന്ന് ചൂണ്ടിക്കാട്ടി ദേശീയ ഹരിത ട്രിബ്യൂണലിന്റേതാണ് ഉത്തരവ്. ഒരു മാസത്തിനുള്ളില്‍ പിഴ ഒടുക്കണമെന്ന് ജസ്റ്റിസുമാരായ ആദര്‍ശ് കുമാര്‍ ഗോയല്‍, സുധീര്‍ അഗര്‍വാള്‍, വിദഗ്ധ സമിതി അംഗം എ സെന്തില്‍വേല്‍ എന്നിവരുള്‍പ്പെട്ട ബെഞ്ച് ഉത്തരവില്‍ വ്യക്തമാക്കി. മാധ്യമ വാര്‍ത്തകളുടെ അടിസ്ഥാനത്തില്‍ ട്രിബ്യൂണല്‍ സ്വമേധയാ രജിസ്റ്റര്‍ ചെയ്ത കേസിലാണ് നടപടി. മലിനീകരണ മുക്ത പരിസ്ഥിതി ഒരുക്കുന്നതില്‍ വീഴ്ചകള്‍ ഉണ്ടായെന്ന് ഉത്തരവില്‍ പറയുന്നു.
തീപിടിത്തത്തിന് കാരണക്കാരായ ഉദ്യോഗസ്ഥര്‍ക്കെതിരെ ക്രിമിനല്‍ നിയമ പ്രകാരവും വകുപ്പുതലത്തിലും നടപടി സ്വീകരിക്കണം. ഇതിനായി ചീഫ് സെക്രട്ടറിയെ ട്രിബ്യൂണല്‍ ചുമതലപ്പെടുത്തി. ഉദ്യോഗസ്ഥര്‍ക്കെതിരെ സ്വീകരിച്ച നടപടി രണ്ടു മാസത്തിനുള്ളില്‍ വ്യക്തമാക്കണമെന്നും ഉത്തരവില്‍ പറയുന്നു. പിഴ ചുമത്തിയ ഉത്തരവിനെ നിയമപരമായി നേരിടുമെന്ന് മേയർ അഡ്വ. എം അനിൽകുമാര്‍ അറിയിച്ചു. കോർപറേഷന്റെയോ സർക്കാരിന്റെയോ ഭാഗം കേൾക്കാതെയാണ് നടപടി. ഹൈക്കോടതിയെയോ സുപ്രീം കോടതിയെയോ സമീപിക്കാനാണ് തീരുമാനമെന്നും മേയർ പറഞ്ഞു.
English Summary: Brahmapuram fire; 100 crore fine to Kochi Corporation
You may also like this video
