ഇക്കോ സെന്‍സിറ്റീവ് സോണുമായി ബന്ധപ്പെട്ട് തദ്ദേശ സ്വയംഭരണ സ്ഥാപനങ്ങളുടെ ഹെല്‍പ്പ് ഡെസ്‌കുകളില്‍ ലഭിച്ച മുഴുവന്‍ പരാതികളും പരിഹരിച്ചു. ഹെല്‍പ്പ് ഡെസ്‌കുകളില്‍ ഇതുവരെ ലഭിച്ച 63,615 പരാതികളാണ് പരിഹരിച്ചത്. സര്‍ക്കാരില്‍ ഇ‑മെയില്‍ വിലാസത്തില്‍ ഉള്‍പ്പെടെ ലഭിച്ച എല്ലാ പരാതികളും ഹെല്‍പ്പ് ഡെസ്‌കുകള്‍ക്ക് കൈമാറിയിരുന്നു. കേരള സ്റ്റേറ്റ് റിമോട്ട് സെന്‍സിങ് ആന്റ് എന്‍വയോണ്‍മെന്റ് സെന്ററിന്റെ അസറ്റ് മാപ്പര്‍ ആപ്ലിക്കേഷന്‍ വഴി 81,258 നിര്‍മ്മിതികള്‍ അപ്‌ലോഡ് ചെയ്തിട്ടുണ്ട്.
ഇതോടെ ഇക്കോ സെന്‍സിറ്റീവ് സോണുമായി ബന്ധപ്പെട്ട് ലഭ്യമായ മുഴുവന്‍ നിര്‍മ്മിതികളും അപ്‌ലോഡ് ചെയ്തു. അപ്‌ലോഡ് ചെയ്തവ സംബന്ധിച്ച വിവരങ്ങള്‍ കെഎസ്ആര്‍ഇസി പരിശോധിച്ച ശേഷം അന്തിമ റിപ്പോര്‍ട്ട് തയ്യാറാക്കുന്നതിനായി വിദഗ്ധ പരിശോധനാ സമിതിയ്ക്ക് കൈമാറുമെന്ന് വനം മന്ത്രി എ കെ ശശീന്ദ്രന്‍ അറിയിച്ചു.