മദ്യനയ അഴിമതി കേസുമായി ബന്ധപ്പെട്ട് ഡല്‍ഹി മുഖ്യമന്ത്രി അരവിന്ദ് കെജ്‌രിവാള്‍, എഎപി എംല്‍എ ദുര്‍ഗേഷ് പഥക് എന്നിവരെ പ്രോസിക്യൂട്ട് ചെയ്യാന്‍ സിബിഐക്ക് അനുമതി. പ്രത്യേക കോടതി ജഡ്ജി കവേരി ബവേജയാണ് സിബിഐ സമര്‍പ്പിച്ച അപേക്ഷ അനുസരിച്ച് അനുമതി നല്‍കിയത്.
സിബിഐ ഈമാസം 12നാണ് കോടതിയില്‍ അപേക്ഷ സമര്‍പ്പിച്ചത്. ഇതിനിടെ കേസില്‍ ജാമ്യം തേടി കെജ്‌രിവാള്‍ സമര്‍പ്പിച്ച ജാമ്യാപേക്ഷ ഈമാസം 27 പരിഗണിക്കും. അതേസമയം സിബിഐ രജിസ്റ്റര്‍ ചെയ്ത കേസ് ചോദ്യം ചെയ്തും കേസില്‍ ജാമ്യം തേടിയുമുള്ള കെജ്‌രിവാളിന്റെ ഹര്‍ജി സുപ്രീം കോടതി സെപ്റ്റബര്‍ അഞ്ചിലേക്ക് മാറ്റി. എതിര്‍ സത്യവാങ്മൂലം സമര്‍പ്പിക്കാന്‍ സമയം നല്‍കണമെന്ന് സിബിഐ അഭിഭാഷകന്‍ അഡീഷണല്‍ സോളിസിറ്റര്‍ ജനറല്‍ എസ് വി രാജു ആവശ്യപ്പെട്ടതോടെയാണ് കേസ് നീട്ടിയത്. ജസ്റ്റിസുമാരായ സൂര്യ കാന്ത്, ഉജ്വല്‍ ഭുയാന്‍ എന്നിവരുള്‍പ്പെട്ട ബെഞ്ചാണ് ഹര്‍ജികള്‍ പരിഗണിച്ചത്.