വാഹനത്തില്‍നിന്ന് സിമന്റ് മിക്‌സര്‍ യന്ത്രം നടന്നുപോകുകയായിരുന്ന വഴിയാത്രക്കാരിയുടെ തലയിലേക്ക് വീണ് ഗുരുതര പരിക്ക്. കൂടെയുണ്ടായിരുന്ന മകള്‍ അദ്ഭുതകരമായി രക്ഷപ്പെട്ടു. കന്യാകുമാരി കുളത്തുറയിലാണ് ഞെട്ടിക്കുന്ന അപകടം നടന്നത്. അപകടത്തിന്റെ സിസിടിവി ദൃശ്യങ്ങള്‍ പുറത്തുവന്നു.
റോഡിന്റെ അരികിലൂടെ നടന്നുവരികയായിരുന്നു സ്ത്രീയും മകളും. ഇതിനിടെ എതിരേ വന്ന വാഹനത്തില്‍ ഘടിപ്പിച്ച് കൊണ്ടുപോവുകയായിരുന്ന സിമന്റ് മിക്‌സര്‍ യന്ത്രം ഇവരുടെ മേലേക്ക് പതിക്കുകയായിരുന്നു. ഗുരുതര പരിക്കേറ്റ യുവതിയെ ആശുപത്രിയില്‍ പ്രവേശിപ്പിച്ചു. സംഭവത്തില്‍ കളയിക്കാവിള പൊലീസ് കേസെടുത്തു.