ചൈനീസ് നടനും ഗായകനും മ്യൂസിക് വീഡിയോ സംവിധായകനുമായ അലൻ യു മെങ്ലോംഗ്(37) കെട്ടിടത്തിൽനിന്ന് വീണു മരിച്ചു. അദ്ദേഹത്തിന്റെ മാനേജ്മെന്റ് ടീം വെയ്ബോയിലൂടെ പുറത്തിറക്കിയ പ്രസ്താവനയിലൂടെയാണ് മരണവാർത്ത സ്ഥിരീകരിച്ചത്. സംഭവത്തിൽ ദുരൂഹതകളില്ലെന്ന് പൊലീസ് അറിയിച്ചു.
2007ൽ ‘മൈ ഷോ, മൈ സ്റ്റൈൽ’ എന്ന റിയാലിറ്റി ഷോയിൽ പങ്കെടുത്തുകൊണ്ടാണ് യു മെങ്ലോംഗ് തന്റെ കരിയർ ആരംഭിച്ചത്. 2011ൽ ‘ദി ലിറ്റിൽ പ്രിൻസ്’ എന്ന ഹ്രസ്വചിത്രത്തിലൂടെ അഭിനയരംഗത്തേക്ക് കടന്നുവന്നു. ‘ഗോ പ്രിൻസസ് ഗോ’, ‘ലവ് ഗെയിം ഇൻ ഈസ്റ്റേൺ ഫാന്റസി’, ‘ഫ്യൂഡ്’, ‘എറ്റേണൽ ലവ്’ തുടങ്ങിയ നിരവധി ചൈനീസ് പരമ്പരകളിൽ അദ്ദേഹം അഭിനയിച്ചിട്ടുണ്ട്. ‘ദി മൂൺ ബ്രൈറ്റൻസ് ഫോർ യു’ എന്ന ചിത്രത്തിലെ ‘ലിൻ ഫാംഗ്’ എന്ന കഥാപാത്രം അദ്ദേഹത്തിന് നിരവധി ആരാധകരെ നേടിക്കൊടുത്തു. അഭിനയത്തിന് പുറമേ, മ്യൂസിക് വീഡിയോ സംവിധായകനായും അദ്ദേഹം പ്രവർത്തിച്ചിരുന്നു.