മുഖ്യമന്ത്രി പിണറായി വിജയന് പിആർ ഏജൻസിയുടെ ആവശ്യമില്ലെന്ന് വിദ്യാഭ്യാസ മന്ത്രി വി ശിവൻകുട്ടി. കേരള രാഷ്ട്രീയത്തിൽ ഇതിനുമുമ്പ് നിരവധി വിവാദങ്ങൾ ഉണ്ടായിട്ടുണ്ട്. എന്നാൽ സർക്കാരോ നേതാക്കളോ പിആർ ഏജൻസിയുടെ സഹായത്തോടെയാണ് പ്രവർത്തിക്കുന്നതെന്ന ആക്ഷേപമുണ്ടായിട്ടില്ല. ചെറുതും വലുതുമായ ഓരോ കാര്യങ്ങളും മുഖ്യമന്ത്രിക്കെതിരെ തിരിക്കുകയാണ്. ആരോപണങ്ങൾ തള്ളിക്കളയുകയാണെന്നും ജനങ്ങള്‍ സത്യം തിരിച്ചറിയുമെന്നും മന്ത്രി പറഞ്ഞു. അൻവർ വിഷയത്തിലുള്ള നിലപാട് മുഖ്യമന്ത്രിയും പാർട്ടിയും നേരത്തെ വ്യക്തമാക്കിയിട്ടുണ്ട്. ആരോപണങ്ങളെ പെരുമഴയത്തുണ്ടാകുന്ന കുമിളയായി കണ്ടാൽ മതി. സിപിഐ(എം) വിട്ടുപോയവർ യോഗം വിളിച്ചതൊക്കെ മുമ്പും കണ്ടിട്ടുണ്ട്. ഇടതുപക്ഷ വിരുദ്ധശക്തികളാണ് ഇതിന് പിന്നിലെന്നും ശിവൻകുട്ടി പറഞ്ഞു.
മുഖ്യമന്ത്രിക്ക് പിആര്‍ ഏജൻസിയുടെ ആവശ്യമില്ല: മന്ത്രി വി ശിവന്‍കുട്ടി
