വാഹനങ്ങൾ തടഞ്ഞ് പണപ്പിരിവ് നടത്തിയ സംഘം തടയാനെത്തിയ പൊലീസ് ഉദ്യോഗസ്ഥരെ ആക്രമിച്ചു. കഴിഞ്ഞ ദിവസം രാത്രി കാക്കൂർ ചേളന്നൂരിലാണ് അക്രമ സംഭവങ്ങൾ അരങ്ങേറിയത്. സംഘത്തിന്റെ ആക്രമണത്തിൽ കാക്കൂർ എസ്ഐ അബ്ദുൾ സലാം ഉൾപ്പെടെയുള്ള ഉദ്യോഗസ്ഥർക്ക് പരിക്കേറ്റു. പൊലീസ് ജീപ്പിന് നേരെയും സംഘം ആക്രമണം നടത്തി. സംഭവത്തിൽ നാല് പേരെ പൊലീസ് അറസ്റ്റ് ചെയ്തു. മദ്യ ലഹരിയിലായിരുന്ന ഒരു സംഘം യുവാക്കളാണ് രാത്രി റോഡിൽ വാഹനങ്ങൾ തടഞ്ഞുനിര്ത്തി പണപ്പിരിവ് നടത്തിയത്. പണം നൽകാൻ തയ്യാറാകാത്തവരെ സംഘം അസഭ്യം പറഞ്ഞു.
നാട്ടുകാർ വിവരം അറിയിച്ചതിനെത്തുടർന്ന് സ്ഥലത്തെത്തിയ പൊലീസ് സംഘത്തെ യുവാക്കൾ ആക്രമിക്കുകയായിരുന്നു. പൊലീസ് വാഹനത്തിന്റെ ചില്ലും വയർലെസ് സെറ്റിന്റെ ആന്റിനയും സംഘം തകർത്തു. ഒടുവിൽ നാട്ടുകാരുടെ സഹായത്തോടെയാണ് പൊലീസ് പ്രതികളെ കീഴടക്കിയത്. ചേളന്നൂർ കണ്ണങ്കര സ്വദേശികളായ കെ എൻ സുബിൻ, ഇ എം റിജീഷ്, വെസ്റ്റ് ഹിൽ സ്വദേശി ഇ കെ അജേഷ്, ഇരുവള്ളൂർ സ്വദേശി കെ എം അതുൽ എന്നിവരാണ് പിടിയിലായത്. പ്രതികളുടെ ആക്രമണത്തിൽ പരിക്കേറ്റ പൊലീസ് ഉദ്യോഗസ്ഥർ കോഴിക്കോട്ടെ ആശുപത്രിയിൽ ചികിത്സയിലാണ്.
English Summary;Collection of money by impounding vehicles; Attack on the police
You may also like this video
