ധർമ്മസ്ഥലയില് മൃതദേഹങ്ങള് കണ്ടെത്തിയ സംഭവത്തില് രജിസ്റ്റര് ചെയ്ത എഫ്ഐആറിലെ അന്വേഷണ നടപടികള് സ്റ്റേ ചെയ്ത് കര്ണാടക ഹൈക്കോടതി. ആക്ടിവിസ്റ്റുകളായ ഗിരീഷ് മട്ടന്നവര്, മഹേഷ് ഷെട്ടി തിമറോഡി, ടി ജയന്ത്, വിട്ടാല ഗൗസ എന്നിവര് സമര്പ്പിച്ച ഹര്ജിയിലാണ് ജസ്റ്റിസ് മുഹമ്മദ് നവാസിന്റെ ഇടക്കാല ഉത്തരവ്. ഹര്ജിയില് നവംബർ 12ന് വിശദമായ വാദം കേള്ക്കും.
കേസിൽ വാദിയോ പ്രതിയോ അല്ലെന്നിരിക്കെ തങ്ങൾക്ക് പത്തുതവണ സമന്സ് നല്കിയെന്നും ഇത് നിയമവിരുദ്ധമാണെന്നും ചൂണ്ടിക്കാണിച്ചാണ് ഇവര് ഹൈക്കോടതിയെ സമീപിച്ചത്. പ്രത്യേകം എഫ്ഐആർ രജിസ്റ്റർ ചെയ്യാതെ ഒരേ കേസിൽ പലതവണ നോട്ടീസ് അയച്ചത് ശരിയായ നടപടിയല്ലെന്ന് കോടതി നിരീക്ഷിച്ചു. നിരവധി സ്ത്രീകളുടെയും കുട്ടികളുടെയും മൃതദേഹങ്ങള് മറവ് ചെയ്തെന്നായിരുന്നു ശുചീകരണ തൊഴിലാളി സി എൻ ചിന്നയ്യ വെളിപ്പെടുത്തിയത്. ധർമ്മസ്ഥലയിലെ 13 ഇടങ്ങളാണ് പ്രത്യേകാന്വേഷണ സംഘത്തിന് മുമ്പാകെ സാക്ഷി ചൂണ്ടിക്കാണിച്ച് നൽകിയത്.