തണ്ണീർമുക്കം റോഡിൽ കട്ടച്ചിറ പാലത്തിന് സമീപം മൂന്ന് കാറുകൾ തമ്മിൽ കൂട്ടിയിടിച്ച് നാലുപേർക്ക് പരിക്കേറ്റു. വെള്ളിയാഴ്ച ഉച്ചയ്ക്ക് ഒരു മണിക്കായിരുന്നു അപകടം. പരിക്കേറ്റ നാലുപേരും കോട്ടയം സ്വദേശികളാണ്. ഇന്നോവയും മറ്റൊരു കാറും തമ്മിൽ കൂട്ടിയിടിച്ച് കാറിന്റെ വീൽ തെറിച്ച് ഈ സമയം എതിരെ വന്ന പോളോ കാറിൽ ഇടിക്കുകയായിരുന്നു. പോളോ കാർ നിയന്ത്രണം തെറ്റി പാലത്തിന്റെ കൈവരികൾ തകർത്താണ് നിന്നത്. ഇന്നോവയുമായി കൂട്ടിയിടിച്ച് കാർ നിയന്ത്രണം തെറ്റി കൈവരികൾ തകർത്ത് താഴേക്ക് പതിച്ചു. ചേർത്തലയിൽ നിന്ന് അഗ്നിരക്ഷാസേനയും ചേർത്തല, മുഹമ്മ പോലീസും എത്തിയാണ് രക്ഷാപ്രവർത്തനത്തിന് നേതൃത്വം നൽകിയത്.
അപകടത്തെ തുടർന്ന് റോഡിൽ ഗതാഗതം തടസ്സപ്പെട്ടു. അഗ്നി രക്ഷാസേന എത്തി അപകടത്തിൽപ്പെട്ട വാഹനങ്ങൾ നീക്കിയ ശേഷമാണ് ഗതാഗതം പുനസ്ഥാപിച്ചത്. സാരമായി പരിക്കേറ്റ ഇന്നോവ കാറിൽ ഉണ്ടായിരുന്ന കോട്ടയം സ്വദേശി റോണി വർഗീസിനെ എറണാകുളം സ്വകാര്യ ആശുപത്രിയിലും കോട്ടയം സ്വദേശി ജോഫനെ ചേർത്തല താലൂക്ക് ആശുപത്രിയിലും പ്രവേശിപ്പിച്ചു. മറ്റു രണ്ടുപേരുടെ പരിക്ക് ഗുരുതരമല്ല.
English Summary: Four people were injured in the collision between the cars