ബിഹാറിൽ വ്യാജമദ്യ ദുരന്തം; മരണസംഖ്യ 25 ആയി

ബിഹാറിൽ വ്യാജമദ്യ ദുരന്തത്തിൽ മരിച്ചവരുടെ എണ്ണം 25 ആയി ഉയര്‍ന്നു. 49 പേർ ചികിത്സയിലാണ്. സിവാൻ, സരൻ ജില്ലകളിലുള്ളവരാണ് മരിച്ചത്. മീഥൈൽ ആൽക്കഹോൾ കലർത്തിയ മദ്യമാണ് ദുരന്തകാരണമെന്നാണ് റിപ്പോർട്ട്. മുഖ്യമന്ത്രി നിതിഷ് കുമാർ സംഭവത്തിൽ ഉന്നത പൊലീസ് ഉദ്യോ​ഗസ്ഥരുമായി ചർച്ച നടത്തിയിരുന്നു. സംഭവത്തിൽ 25 പേരെ പൊലീസ് അറസ്റ്റ് ചെയ്തു. 50 ഇടങ്ങളിലായി നടത്തിയ റെയ്ഡിൽ 1650 ലിറ്റർ മദ്യമാണ് പിടിച്ചെടുത്തത്. ദുരന്തത്തിന്റെ ഉത്തരവാദി എൻഡിഎ സർക്കാറാണെന്നും വ്യാജ മദ്യ വിൽപനയ്ക്ക് പിന്നിൽ ഉന്നതരാണെന്നും ആർജെഡി ആരോപിച്ചു.