തിരുവിതാംകൂറിലെ ആദ്യ ട്രേഡ് യൂണിയൻ

തിരുവിതാംകൂറിലെ ആദ്യതൊഴിലാളി സംഘടന രൂപം കൊള്ളുന്നത് ആലപ്പുഴയിലാണ്. ആദ്യ തൊഴിലാളി യൂണിയനായ ലേബർ യൂണിയൻ രൂപീകരിച്ചതിന്റെ നൂറാം വാർഷികം 2022 മാർച്ച് 31 നായിരുന്നു. 1859 ലാണ് ആദ്യത്തെ ഡാറാ സ്മെയിൽ എന്ന കയർ ഫാക്ടറി ആലപ്പുഴയിൽ സ്ഥാപിക്കുന്നത്. പിന്നീട് ബോംബെ കമ്പനി, ആസ്പിൻവാൾ, വോൾക്കാട്ട് ബ്രദേഴ്സ്, വില്യം ഗുഡേക്കർ, എമ്പയർ കയർ വർക്ക്സ് കമ്പനി, തോമസ് ഡിക്രൂസ് കമ്പനി തുടങ്ങിയ നിരവധി ഫാക്ടറികൾ സ്ഥാപിക്കപ്പെട്ടു. അൻപതിനായിരത്തോളം തൊഴിലാളികൾ ആലപ്പുഴയിലെ കയർ ഫാക്ടറികളിൽ പണിയെടുത്തിരുന്നു. തൊഴിൽ സമയത്തിന് വ്യവസ്ഥയുണ്ടായിരുന്നില്ല. അതിരാവിലെ മുതൽ വൈകുന്നത് വരെ ജോലിയെടുക്കണം. വെളുപ്പിന് കുടി കിടപ്പുകാരനായ തൊഴിലാളി ജന്മിയുടെ തെങ്ങു നനയ്ക്കണം. കുളത്തിൽ നിന്നും മൺകുടത്തിൽ വെള്ളം കോരി തെങ്ങ് നനച്ചതിന് ശേഷമാണ് രാവിലെ തന്നെ ഫാക്ടറിയിൽ എത്തുന്നത്. ഫാക്ടറിയിൽ കങ്കാണിയും മൂപ്പനും മേസ്തിരിയും പറയുന്നതെല്ലാം അനുസരിക്കണം. അനുസരണക്കേട് കാണിച്ചാൽ ശിക്ഷ കടുത്തതാകും. കൂലി കിട്ടുന്ന ദിവസം ‘മൂപ്പ് കാശ്’ എന്ന പേരിൽ മൂപ്പന്മാർക്ക് വിഹിതം നൽകണം. അത് നൽകിയേ മതിയാകൂ. തൊഴിലാളി മെച്ചപ്പെട്ട വസ്ത്രം ധരിക്കുവാൻ പാടില്ല. തൊഴിൽ ചെയ്യുമ്പോൾ ഉണ്ടാകുന്ന ചെറിയ പിഴവുകൾക്ക് വലിയ പിഴയും ശാരീരിക പീഡനവും ഉറപ്പ്. തൊഴിലാളികൾ അനുഭവിക്കുന്ന ഈ ദുരിതങ്ങൾ എമ്പയർ കയർ വർക്സ്സിൽ മൂപ്പനായിരുന്ന വാടപ്പുറം ബാവ ശ്രീനാരായണഗുരുവിനെ ബോധ്യപ്പെടുത്തി. തൊഴിലെടുക്കുന്നവരുടെ ഒരു സംഘം ഉണ്ടാക്കുക, സംഘത്തിന്റെ ശക്തിയിൽ അവർ കരുത്തുള്ളവരും സ്വതന്ത്രരും ആകട്ടെ എന്നായിരുന്നു ഗുരുവിന്റെ ഉപദേശം. ഈ ആശയം ആലപ്പുഴയിലെ പൗര പ്രമുഖരുമായി ബാവ ചർച്ച ചെയ്തതാണ് 1922‑ൽ ലേബർ യൂണിയൻ രൂപം കൊണ്ടത്. വാടപ്പുറം ബാവയായിരുന്നു സ്ഥാപക ജനറൽ സെക്രട്ടറി. അഡ്വ. പി കെ മുഹമ്മദായിരുന്നു പ്രസിഡന്റ്. തിരുവിതാംകൂറിലാകെ പ്രവർത്തിക്കുന്നതിനായി ഈ സംഘടനയുടെ പേര് പിന്നീട് തിരുവിതാംകൂർ ലേബർ അസോസിയേഷൻ എന്നാക്കിമാറ്റി. ആദ്യഘട്ടത്തിൽ തൊഴിലാളികളിൽ നിന്നും ചെറിയ തുക സംഭരിച്ച് ചികിത്സാ സഹായം നൽകുക, വായനശാലകൾ സ്ഥാപിക്കുക തുടങ്ങിയ പ്രവർത്തനങ്ങൾ നടത്തി.

പിന്നീട് സാമൂഹ്യ പുരോഗതിയുമായി ബന്ധപ്പെട്ട മുദ്രാവാക്യങ്ങളും ഈ അസോസിയേഷൻ മുന്നോട്ട് വച്ചു. തിരുവിതാംകൂർ ലേബർ അസോസിയേഷൻ വായനശാലയും വാടകക്കെട്ടിടത്തിൽ ആശുപത്രിയും സ്ഥാപിച്ചു. ഇവർ അംഗങ്ങളുടെ വീടുകളിൽ മരണം ഉണ്ടായാൽ സഹായിക്കുന്നതിന് മരണഫണ്ടും രൂപീകരിച്ചു. പ്രശസ്തമായ വൈക്കം സത്യഗ്രഹത്തിന് 50 പേരെ ഈ യൂണിയൻ പങ്കെടുപ്പിച്ചതിലൂടെ അന്ന് നിലനിന്നിരുന്ന സാമൂഹ്യ അനാചാരങ്ങൾക്കെതിരെയുള്ള ശക്തമായ നിലപാടും വ്യക്തമാക്കി. നിയമസഭയിലും പ്രജാസഭയിലും പ്രാതിനിധ്യം അനുവദിക്കുക, അയിത്തോച്ചാടനത്തിന് രാജകീയ വിളംബരം നടത്തുക, പ്രാഥമിക വിദ്യാഭ്യാസം നിർബന്ധിതമാക്കുക, ഫാക്ടറികളിൽ വൈദ്യ പരിശോധനയ്ക്ക് ഏർപ്പാട് ചെയ്യുക, വൃദ്ധന്മാർക്കും തൊഴിൽ ചെയ്യാൻ കഴിയാത്തവർക്കും സഹായം നൽകുന്നതിന് പ്രത്യേക ഫണ്ട് അനുവദിക്കുക, പ്രായപൂർത്തി വോട്ടവകാശം അനുവദിക്കുക തുടങ്ങിയ ആവശ്യങ്ങളാണ് അന്ന് ഉന്നയിച്ചത്. ‘തൊഴിലാളി’ എന്ന പേരിൽ ഒരു പ്രസിദ്ധീകരണവും അവർ ആരംഭിച്ചു. തമിഴ്‌നാട്ടിൽ നിന്നുള്ള ഇ വി രാമസ്വാമി നായ്ക്കർ, പിന്നീട് രാഷ്ട്രപതിയായ വി വി ഗിരി ഉൾപ്പെടെയുള്ള പ്രമുഖർ അന്നത്തെ വിവിധ വാർഷിക സമ്മേളനങ്ങളിൽ മുഖ്യാതിഥികളായിരുന്നു. ബോംബെ കമ്പനി എന്ന കയർ ഫാക്ടറിയിലെ തൊഴിലാളികൾ നൂറു തടുക്കിന് 80 ചക്രം കൂലി ആവശ്യപ്പെട്ടുകൊണ്ട് 1931‑ൽ നടത്തിയ പണിമുടക്കായിരുന്നു ആദ്യത്തെ സമരം. വേണ്ടത്ര വിജയം നേടാനാകാതെയാണ് ഈ സമരം അവസാനിച്ചത്. തങ്ങളുടെ അവശതകൾ ഉൾക്കൊള്ളുന്ന നിവേദനം തിരുവനന്തപുരത്ത് എത്തി രാജാവിന് സമർപ്പിക്കുന്നതിന് കൊല്ലം ജോസഫ് ലീഡറായി 50 പേരടങ്ങുന്ന ജാഥാ സംഘത്തെ നിശ്ചയിച്ചു. ജാഥ നിരോധിക്കപ്പെട്ടു. കൊല്ലം ജോസഫ്, കെ സി ഗോവിന്ദൻ, വി കെ പുരുഷോത്തമൻ എന്നീ നേതാക്കളെ അറസ്റ്റ് ചെയ്തു.

ഇതുകൂടി വായിക്കൂ: മനുഷ്യ നന്മയുടെ പ്രതീകം

ഇതിൽ പ്രതിഷേധിച്ച് തൊഴിലാളികൾ പണിമുടക്കി. 12-ാമത് വാർഷിക സമ്മേളനം ആർ സുഗതനെ ജനറൽ സെക്രട്ടറിയായി തെരഞ്ഞെടുത്തു. അതിന് മുൻപ് പി കേശവദേവായിരുന്നു ജനറൽ സെക്രട്ടറി. പൊതുപണിമുടക്ക് ആഹ്വാനത്തെ തുടർന്ന് ആർ സുഗതൻ, പി കെ കുഞ്ഞ്, പി എൻ കൃഷ്ണപിള്ള, വി കെ പുരുഷോത്തമൻ, സി കെ വേലായുധൻ എന്നിവർ അറസ്റ്റിലായി. നേതാക്കളെ മോചിപ്പിക്കണമെന്ന് ആവശ്യപ്പെട്ടുകൊണ്ട് തൊഴിലാളികൾ പൊലീസ് സ്റ്റേഷനു മുന്നിൽ തടിച്ചു കൂടി. അന്നു നടന്ന ലാത്തി ചാർജിൽ ബാവ (ഗരുഡൻ ബാവ) എന്ന തൊഴിലാളി രക്തസാക്ഷിയായി. ആലപ്പുഴയിലെ തൊഴിലാളി സമരത്തിലെ ആദ്യ രക്തസാക്ഷിയാണ് ബാവ. സംഭവം അന്വേഷിക്കുവാൻ പി കൃഷ്ണപിള്ള ഇവിടെയെത്തി. അദ്ദേഹത്തിന്റെ നിർദ്ദേശ പ്രകാരം കെ ദാമോദരനും കെ കെ വാര്യരും ആലപ്പുഴയിലെത്തി. പ്രശ്നങ്ങളിൽ ഇടപെട്ട ഇവർ തൊഴിലാളികളിൽ രാഷ്ട്രീയബോധം പകർന്നു. 1937 ൽ വീണ്ടും പൊതുപണിമുടക്ക് ആഹ്വാനം ചെയ്തതിനെ തുടര്‍ന്ന് ആർ സുഗതൻ അറസ്റ്റിലായി. ചില നിയമ നിർമ്മാണങ്ങൾ നടത്താതെ സർക്കാരിന് മുന്നോട്ട് പോകാൻ കഴിയാത്ത സ്ഥിതിയായി. അങ്ങനെയാണ് ഫാക്ടറീസ് ആക്ട്, ട്രേഡ് ഡിസ്പ്യൂട്ട് ആക്ട്, വർക്ക്മെൻ കോമ്പൻസേഷൻ ആക്ട്, ട്രേഡ് യൂണിയൻ ആക്ട് എന്നിവ പാസാക്കിയത്. ഈ ട്രേഡ് യൂണിയൻ ആക്ട് പ്രകാരം തിരുവിതാംകൂറിൽ 1938 (1113 കർക്കിടകം 9) ൽ ഒന്നാം നമ്പരായി തിരുവിതാംകൂർ കയർ ഫാക്ടറി വർക്കേഴ്സ് യൂണിയൻ രജിസ്റ്റർ ചെയ്തു. പിന്നീട് ചേർത്തല, മുഹമ്മ എന്നിവിടങ്ങളിലും കയർ ഫാക്ടറി യൂണിയനുകൾ രജിസ്റ്റർ ചെയ്തു. ഈ യൂണിയനെ വിപ്ലവ ട്രേഡ് യൂണിയനായി മാറ്റിയെടുക്കുന്നതിൽ പി കൃഷ്ണപിള്ള വലിയ പങ്കുവഹിച്ചു. (ടി ജെ ആഞ്ചലോസ് എഴുതിയ ലേഖനത്തില്‍ നിന്ന്)