ദ്വാരകയിലെ പ്രേം നഗർ പ്രദേശത്ത് വീടിന് തീപിടിച്ചതിനെ തുടർന്ന് ഒരു കുടുംബത്തിലെ നാല് പേർ ശ്വാസം മുട്ടി മരിച്ചു.ഹീരാ സിംഗ് കക്കർ (48), ഭാര്യ നീതു (40), മക്കളായ റോബിൻ (22), ലക്ഷയ് (21) എന്നിവരാണ് മരിച്ചത്.
പുലർച്ചെ 3.30 ഓടെയാണ് തീപിടിത്തം ഉണ്ടായത് .തുടര്‍ന്ന് രണ്ട് ഫയർ ടെൻഡറുകൾ സംഭവസ്ഥലത്തെത്തി തീ നിയന്ത്രണവിധേയമാക്കിയെന്ന് ഡൽഹി ഫയർ സർവീസസ് ഉദ്യോഗസ്ഥന്‍ പറഞ്ഞു.
ഇൻവെർട്ടറില്‍ നിന്നുണ്ടായ തീ സോഫയിലേക്ക് പടരുകയും അവിടെ നിന്നു വീടുനുള്ളില്‍ മുഴുവന്‍ വ്യാപിക്കുകയായിരുന്നു. ഏതാനും മിനിറ്റുകൾക്കുള്ളിൽ തീ അണച്ചെങ്കിലും വീടിനുള്ളിൽ പുക തങ്ങിനില്‍ക്കുന്നുണ്ടായിരുന്നുവെന്ന് ഉദ്യോഗസ്ഥർ പറഞ്ഞു.ഫയർ സർവീസസ് ഉദ്യോഗസ്ഥര്‍ എത്തി നാലുപേരെയും റാവു തുലാറാം മെമ്മോറിയൽ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാന്‍ സാധിച്ചില്ല.
മൃതദേഹങ്ങൾ മോർച്ചറിയിലേക്ക് മാറ്റി. ബന്ധപ്പെട്ട വകുപ്പുകൾ പ്രകാരം കേസ് രജിസ്റ്റർ ചെയ്തിട്ടുണ്ടെന്നും കൂടുതൽ അന്വേഷണം നടന്നുവരികയാണെന്നും പൊലീസ് അറിയിച്ചു. അപകടത്തില്‍ ഹീരാ സിങ് കക്കറിന്റെ അമ്മ സീതാദേവിയ്ക്ക് പരിക്കൊന്നും പറ്റിയിട്ടില്ലെന്ന് പൊലീസ് ഉദ്യോഗസ്ഥൻ പറഞ്ഞു.
English Summary: Four members of a family d ied of suffocation in a house fire
You may also like this video
