ആത്മവിശ്വാസവും ശാരീരികമായ കരുത്തും കൊണ്ട് പെൺകുട്ടികൾക്ക് പ്രതിസന്ധികളെ തരണം ചെയ്യാൻ കഴിയണമെന്ന് സംസ്ഥാന വനിത കമ്മീഷൻ അദ്ധ്യക്ഷ അഡ്വ.പി.സതീദേവി. സമഗ്ര ശിക്ഷാ കേരളയുടെ നേതൃത്വത്തിൽ ജില്ലയിലെ 7 മുതൽ 12 വരെയുള്ള ക്ലാസുകളിലെ പെൺകുട്ടികൾക്കായി നടത്തുന്ന സ്വയം പ്രതിരോധ പരിശീലനത്തിൻ്റെ ജില്ലാതല ഉദ്ഘാടനം നടക്കാവ് ഗേൾസ് ഹയർ സെക്കണ്ടറി സ്കൂളിൽ നിർവ്വഹിച്ച് സംസാരിക്കുകയായിരുന്നു അവർ. സ്വയം നിർണയിക്കാനും പ്രതിസന്ധി ഘട്ടങ്ങളെ അതിജീവിക്കാനും കരുത്ത് കാട്ടുന്നതിൽ പെൺകുട്ടികൾ പരാജയ പ്പെടുന്നതാണ് സമീപകാലത്തെ പല പ്രശ്നങ്ങൾക്കും കാരണം.
ലിംഗപരമായ സമത്വത്തിലേക്ക് സ്ത്രീകൾ എത്തിച്ചേരണം. കോഴിക്കോട് ഈ അടുത്ത കാലത്ത് പെൺകുട്ടികളോട് ശാരീരിക അതിക്രമത്തിന് മുതിർന്ന സാമൂഹ്യ വിരുദ്ധനെ ആ പെൺകുട്ടികളിലൊരാൾ കായികമായി നേരിടുകയും പോലീസിൽ ഏൽപ്പിക്കുകയും ചെയ്തിരുന്നു. അത്തരത്തിലുള്ള പെൺകുട്ടികൾ വളർന്നു വരുന്ന നാടാണിത്. അന്ന് ആ കുട്ടിയെ വീട്ടിൽ പോയി അഭിനന്ദിച്ചിരുന്നു. അതിക്രമങ്ങളെ നേരിടാൻ ഓരോ പെൺകുട്ടിയും ഇത്തരത്തിൽ കരുത്ത് കാണിക്കണം. മാനസികമായി കൂടി ബലം നേടാൻ കായിക അഭ്യാസങ്ങളും ആയോധനകലകളും സഹായകമാകും. മറ്റൊരു വീട്ടിൽ പോയി ജീവിക്കേണ്ടതാണ് എന്ന സന്ദേശം നൽകി വളർത്തുന്നതിനു പകരം ആത്മാഭിമാനത്തോടെ വളരാൻ രക്ഷിതാക്കൾ പെൺകുട്ടികൾക്ക് അവസരമൊരുക്കണമെന്നും അവർ കൂട്ടിച്ചേർത്തു.
ജില്ലയിലെ സർക്കാർ സ്കൂളുകളിലെ വിദ്യാർത്ഥിനികൾക്ക് കരാട്ടേ, കളരി, കുങ്ഫൂ , നീന്തൽ, എയറോബിക്സ് ഇനങ്ങളിലാണ് പരിശീലനം നൽകുന്നത്. കുട്ടികളിൽ ആത്മവിശ്വാസവും സ്വയം പ്രതിരോധത്തിനുള്ള കഴിവും വർദ്ധിപ്പിക്കുക എന്നതാണ് സ്പോർട്സ് കൗൺസിലിന്റെ സഹകരണത്തോടെ നടത്തുന്ന പദ്ധതിയുടെ ലക്ഷ്യം.
ചടങ്ങിൽ സമഗ്ര ശിക്ഷാ കേരള കോഴിക്കോട് ജില്ലാ പ്രോജക്റ്റ് കോഡിനേറ്റർ ഡോ.എ.കെ.അബ്ദുൾ ഹക്കിം അദ്ധ്യക്ഷത വഹിച്ചു. ജില്ലാ പ്രോഗ്രാം ഓഫീസർ വി.പ്രവീൺ കുമാർ, നടക്കാവ് ജിവിഎച്ച്എസ്എസ് പ്രിൻസിപ്പാൾ കെ.ബാബു, ഹെഡ് മാസ്റ്റർ എം.ജയകൃഷ്ണൻ തുടങ്ങിയവർ സംസാരിച്ചു. ജില്ലാ പ്രോഗ്രാം ഓഫീസർമാർ, ഹയർ സെക്കണ്ടറി പ്രിൻസിപ്പൾമാർ, ഹൈസ്ക്കൂൾ പ്രധാനധ്യാപകർ തുടങ്ങിയവർ പങ്കെടുത്തു.
English Summary: Girls must overcome crises with confidence and physical strength: Women’s Commission
You may like this video also
