കണ്ണൂർ രാജ്യാന്തര വിമാനത്താവളത്തിൽ വീണ്ടും സ്വർണം പിടികൂടി. കോഴിക്കോട് നാദാപുരം സ്വദേശിനിയായ ജസീലയിൽ നിന്നും 11 വയസുകാരിയായ മകളിൽ നിന്നുമാണ് കസ്റ്റംസ് സ്വർണം പിടികൂടിയത്.
ഇന്നലെ രാത്രി ഷാർജയിൽ നിന്നും ഗോ എയർ വിമാനത്തിലെത്തിയതായിരുന്നു ഇരുവരും. ചെക്കിംഗ് പരിശോധനയിൽ അമ്മയെയും മകളെയും കസ്റ്റംസ് പരിശോധിച്ചപ്പോഴാണ് സ്വർണം കണ്ടെത്തിയത്. പേസ്റ്റ് രൂപത്തിലാക്കിയ സ്വർണം പാന്റിനുള്ളിൽ പെയിന്റ് അടിച്ചത് പോലെയാക്കി അതിനു മുകളിൽ തുണി തുന്നി ചേർത്താണ് സ്വർണം ഒളിപ്പിച്ചിരുന്നത്.
പേസ്റ്റ് രൂപത്തിലുളള സ്വർണം പിന്നീട് വേർതിരിച്ചെടുത്തു. 528 ഗ്രാം സ്വർണമാണ് ഇരുവരിൽ നിന്നുമായി പിടിച്ചെടുത്തത്. പിടികൂടിയ സ്വർണത്തിന് 26 ലക്ഷം രൂപ വരും.
English Summary: Gold smuggling through airport: Mother, 11-year-old daughter caught
You may like this video also
