ജൂവലറിയിൽ നിന്ന് 6 കോടി രൂപയുടെ സ്വർണം മോഷ്‌ടിച്ച ജീവനക്കാരിക്ക് 235 വർഷം തടവ് ശിക്ഷ. 47 തവണയായിട്ട് ആണ് യുവതി മോഷണം നടത്തിയത് . തായ്‌ലാന്‍ഡിലെ ഖോന്‍ കെയ്നിലെ ജ്വല്ലറിയിലാണ് മോഷണം നടന്നത്. കടയുടമ സിസിടിവി ദൃശ്യങ്ങള്‍ പരിശോധിച്ചതോടെയാണ് മോഷണം ശ്രദ്ധയില്‍പ്പെട്ടത്. തുടർന്ന് അദ്ദേഹം നൽകിയ പരാതിയുടെ അടിസ്ഥാനത്തിലാണ് കോടതി ശിക്ഷ വിധിച്ചത്.
സോംജിത് ഖുംദുവാംഗ് എന്ന യുവതിയാണ് സ്വർണാഭരണങ്ങള്‍ മോഷ്ടിച്ചത്. ഇവര്‍ ആഭരണങ്ങള്‍ മോഷ്ടിക്കുന്നുണ്ടെന്ന് കടയുടമയ്ക്ക് സംശയം തോന്നിയിരുന്നു. അങ്ങനെയാണ് ജ്വല്ലറിയിലെ സിസിടിവി കാമറ പരിശോധിച്ചത്. പരിശോധനയില്‍ 2021 മുതല്‍ സോംജിത് ആഭരണങ്ങള്‍ മോഷ്ടിക്കുന്നതായി കണ്ടെത്തി.