കോംട്രസ്റ്റ് വീവിംഗ് ഫാക്ടറി അടച്ചുപൂട്ടിയിട്ട് പതിനാല് വർഷം പിന്നിട്ടു. സെൻട്രൽ ലൈബ്രറിക്ക് സമീപം തുടരുന്ന തൊഴിലാളികളുടെ രണ്ടാം ഘട്ട അനിശ്ചിതകാല സത്യാഗ്രഹ സമരത്തിന്റെ 49-ാം ദിവസം പതിനഞ്ചാം വാർഷിക ഓർമ്മ ദിന സത്യാഗ്രഹമായി നടത്തി. സി പി ഐ സംസ്ഥാന എക്സിക്യൂട്ടീവ് അംഗം ടി വി ബാലൻ ഉദ്ഘാടനം ചെയ്തു. കോംട്രസ്റ്റ് വിഷയത്തിൽ ഗവൺമെന്റ് ഇനിയും അലംഭാവം കാണിക്കരുതെന്ന് ടി വി ബാലൻ പറഞ്ഞു.
പതിനാല് വർഷമായി തൊഴിലാളികൾ നടത്തിവരുന്ന സമരത്തെ നീചമായ പ്രവൃത്തിയിലൂടെ തളർത്താൻ ശ്രമിച്ചിട്ടും അതിനെയെല്ലാം അതിജീവിച്ചവരാണ് തൊഴിലാളികളും അവർക്ക് നേതൃത്വം നൽകുന്ന സംഘടനകളും. കേരള ഗവൺമെന്റ് പാസാക്കിയ ബില്ലിന് കേന്ദ്രാനുമതി ലഭിച്ചിട്ടും അത് നടപ്പിലാക്കാതിരിക്കുന്ന സമീപനം സർക്കാർ ഉപേക്ഷിക്കണം. സമരം തൊഴിലാളികൾക്ക് വേണ്ടി മാത്രമല്ലെന്നും ഓരോ വ്യവസായ സ്ഥാപനങ്ങളും നിലനിൽക്കാൻ വേണ്ടിയാണെന്ന സന്ദേശം എല്ലാവരും തിരിച്ചറിയണമെന്നും ടി വി ബാലൻ പറഞ്ഞു.
സമരത്തെ ബിജെപി ദേശീയ കൗൺസിൽ അംഗം സി കെ പത്മനാഭൻ അഭിവാദ്യം ചെയ്തു. സമര സമിതി കൺവീനർ ഇ സി സതീശൻ അധ്യക്ഷത വഹിച്ചു. പി ശശിധരൻ, എം മുഹമ്മദ് ബഷീർ, ബൈജു മേരിക്കുന്ന് സംസാരിച്ചു. പി ശിവപ്രകാശ് സ്വാഗതവും ടി മനോഹരൻ നന്ദിയും പറഞ്ഞു.
English Summary:Govt should not be complacent on Comtrust issue: TV Balan
You may also like this video
