ഇന്ത്യക്കാർക്കുള്ള ഗ്രീന്‍ കാര്‍ഡ് കാലതാമസം പരിഹരിക്കാന്‍ നടപടിയെടുക്കണമെന്ന് പ്രസിഡന്റ് ജോ ബെെഡനോട് ആവശ്യപ്പെട്ട് യുഎസ് നിയമനിർമ്മാതാക്കൾ. കോണ്‍ഗ്രസ് അംഗങ്ങളായ രാജാ കൃഷ്ണമൂര്‍ത്തിയുടെയും ലാറി ബുക‍്ഷന്റെയും നേതൃത്വത്തില്‍ 56 അംഗങ്ങൾ അടങ്ങുന്ന സംഘം സ്റ്റേറ്റ് സെക്രട്ടറി ആന്റണി ബ്ലിങ്കെനും ആഭ്യന്തര സുരക്ഷാ വകുപ്പ് സെക്രട്ടറി അലജാൻഡ്രോ മയോർക്കസിനും കത്ത് നല്‍കി.
തൊഴിൽ അധിഷ്‌ഠിത വിസ അപേക്ഷകൾ ഫയൽ ചെയ്യുന്നതിനുള്ള എല്ലാ തീയതികളും നിലവിലുള്ളത് രേഖപ്പെടുത്തണമെന്ന് കത്തില്‍ ആവശ്യപ്പെട്ടു. വിവേചനപരമായ ഇമിഗ്രേഷൻ സംവിധാനമാണ് കാത്തിരിപ്പ് കാലാവധി വര്‍ധിക്കാനുള്ള അടിസ്ഥാന കാരണമെന്നും പ്രസിഡന്റ് വിഷയത്തില്‍ ഇടപെട്ടാല്‍ പ്രശ്നത്തിന് പരിഹാരം കാണാന്‍ കഴിയുമെന്നും രാജാ കൃഷ്ണമൂര്‍ത്തി പറഞ്ഞു. ആവശ്യമെങ്കിൽ, പ്രസിഡന്റ് തന്റെ പ്രത്യേക അധികാരം വിനിയോഗിക്കണമെന്നും അദ്ദേഹം കൂട്ടിച്ചേര്‍ത്തു.
അപേക്ഷകളുടെ എണ്ണം കണക്കിലെടുക്കുമ്പോൾ, ഇന്ത്യക്കാര്‍ക്ക് ഗ്രീന്‍ കാര്‍ഡ് ലഭ്യമാകാന്‍ 200 വര്‍ഷമെടുക്കുമെന്ന് ഫൗണ്ടേഷൻ ഫോർ ഇന്ത്യ ആന്റ് ഇന്ത്യൻ ഡയസ്‌പോറ സ്റ്റഡീസ് പറയുന്നു. ഗ്രീൻ കാർഡ്, എച്ച്-1 ബി വിസ എന്നിവയുമായി ബന്ധപ്പെട്ട ആശങ്കകൾ പരിഹരിക്കുന്നതിന് എഫ്ഐഐഡിഎസ് നിരവധി ശ്രമങ്ങൾ നടത്തിയിരുന്നു. ഇന്ത്യ, ചൈന തുടങ്ങിയ രാജ്യങ്ങളിൽ നിന്ന് ഓരോ വർഷവും പതിനായിരക്കണക്കിന് ജീവനക്കാരെ നിയമിക്കുന്നതിന് സാങ്കേതിക കമ്പനികൾ ഗ്രീന്‍ വിസകളെ ആശ്രയിക്കുന്നുണ്ട്. എല്ലാ തീയതികളും നിലവിലുള്ളത് എന്ന് അടയാളപ്പെടുത്തുന്നത്, അപേക്ഷകരുടെ രാജ്യം അടിസ്ഥാനമാക്കിയുള്ള മുൻഗണനാ തീയതി പരിഗണിക്കാതെ തൊഴിൽ അടിസ്ഥാനമാക്കിയുള്ള അപേക്ഷകൾ ഫയൽ ചെയ്യാൻ അനുവദിക്കുമെന്നാണ് നിയമനിര്‍മ്മാതാക്കള്‍ പറയുന്നു.
english summary; Green card delays: US lawmakers urge action
you may also like this video;
