മുംബൈയിൽ കനത്ത മഴയിൽ അന്ധേരിയിലെ എംഐഡിസി ഏരിയയിൽ ഓടയിൽ വീണ് ഒരു സ്ത്രീ മരിച്ചു. നാൽപ്പത്തഞ്ചുകാരിയായ വിമൽ അനിൽ ഗെയ്ക്വാദാണ് മരിച്ചത്. ഇന്നലെ മുതൽ മുംബൈയിൽ കനത്ത മഴ തുടരുകയാണ്. തുടര്‍ന്ന് ഐഎംഡി പ്രദേശത്ത് റെഡ് അലർട്ട് പ്രഖ്യാപിച്ചു. പലയിടത്തും വെള്ളക്കെട്ട് അനുഭവപ്പെട്ടു. റോഡുകളിലടക്കം വെള്ളം കയറിയതോടെ ഗതാഗതവും തടസപ്പെട്ടു. റെയിൽവേ ട്രാക്കുകളിൽ വെള്ളം കയറിയത് ട്രെയിൻ സർവീസുകളെയും ബാധിച്ചിരുന്നു. ട്രെയിനുകൾ വൈകിയോടുകയോ ഭാഗികമായി റദ്ദാക്കുകയോ ചെയ്തു. ഒപ്പം തന്നെ വിമാനങ്ങളും വഴിതിരിച്ചു വിട്ടു.
കനത്ത മഴ തുടരുന്ന പശ്ചാത്തലത്തിൽ മുംബൈയിലെ സ്കൂളുകൾക്കും കോളജുകൾക്കും ഇന്ന് അവധി പ്രഖ്യാപിച്ചു. ജനങ്ങളോട് കഴിവതും വീടിനുള്ളിൽ തന്നെ കഴിയാനും സുരക്ഷിതരായിരിക്കാനും കോർപറേഷൻ നിര്‍ദ്ദേശിച്ചു.
മുംബൈയിൽ കനത്ത മഴ; ഓടയിൽ വീണ് സ്ത്രീ മരിച്ചു
