കൊച്ചിയിൽ വൻ കഞ്ചാവ് വേട്ട, 21കിലോയോളം കഞ്ചാവുമായി യുവാവിനെ കൊച്ചി സിറ്റി പൊലീസ് പിടികൂടി.കായംകുളം ചേരാവളളി സുഹൈൽ മൻസിൽ വീട്ടിലെ സുഹൈൽ (26 ) ആണ് പിടിയിലായത്. കൊച്ചി സിറ്റി കേന്ദ്രീകരിച്ച് കഞ്ചാവ് വില്പന നടത്തിവന്ന പ്രതിയെക്കുറിച്ച് ലഭിച്ച രഹസ്യവിവരത്തിന്റെ അടിസ്ഥാനത്തിൽ കൊച്ചി സിറ്റി പോലീസ് ഡെപ്യൂട്ടി പോലീസ് കമ്മീഷണർ .കെ.എസ്
സുദർശൻ നിർദ്ദേശാനുസരണം നർകോട്ടിക് എസിപിയുടെ നേതൃത്വത്തിലുള്ള ഡാൻസ്ഫ് ടീം ഇയാളെ നിരീക്ഷിച്ചുവരികയായിരുന്നു. പാലാരിവട്ടം പാടിവട്ടത്തെ ഹരി അപ്പാർട്മെന്റ് എന്നറിയപ്പെടുന്ന എക്സ്റ്റെൻഡ് ഇൻസ് ഹോട്ടൽ ആൻഡ് ഹോംസ് (XTENT INNS Hotel and Homes) എന്ന അപ്പാർട്ട്മെന്റിൽ ഡാൻസാഫ് ടീമും പാലാരിവട്ടം പൊലീസും നടത്തിയ പരിശോധനയിൽ നിന്നാണ് 21കിലോയോളം കഞ്ചാവുമായി പ്രതി പിടിയിലായത്.
ഇതര സംസ്ഥാനത്തുനിന്നും കഞ്ചാവ് കടത്തിക്കൊണ്ടുവന്ന്‌ കൊച്ചി സിറ്റി കേന്ദ്രീകരിച്ച് വില്പന നടത്തി എറണാകുളത്തെ പ്രമുഖ ഫ്ലാറ്റുകളിൽ താമസിച്ച് ആഡംബര ജീവിതം നയിച്ചു വരികയായിരുന്നു പ്രതി. കഴിഞ്ഞവർഷം കർണാടക രേഷ്വന്ത്പുര റെയിൽവേ സ്റ്റേഷനിൽ 30 കിലോ കഞ്ചാവ് പിടികൂടിയ കേസിലെ പ്രതിയാണ്. ഇയാളുടെ കൂട്ടാളികളെ കുറിച്ചും ഇയാൾക്ക് കഞ്ചാവ് എത്തിച്ചു നൽകിയവരെ കുറിച്ചും അന്വേഷണം നടന്നുവരികയാണ് .കൊച്ചി സിറ്റിയിൽ ഡാൻസാഫ് ടീം വിപുലീകരിച്ചതിന് ശേഷം നിരവധി മയക്കു മരുന്ന് കേസുകളാണ് ഒരു മാസക്കാലം കൊണ്ട് പിടികൂടിയിട്ടുള്ളത്. തുടർന്നും ഇത്തരം ലഹരി മാഫിയകൾക്കെതിരെ ശക്തമായ നടപടികൾ തുടരുമെന്ന്‌ കൊച്ചി സിറ്റി പൊലീസ് കമ്മീഷണർ അറിയിച്ചു