പോകണം എനിക്ക് യാത്രകൾ

പോകണം എനിക്ക് യാത്രകൾ
മണ്ണോട് മണ്ണാവുന്നതിൻ മുൻപായി
വാത്സല്യത്തിൻ തലോടൽ കൊതിക്കുന്ന
നെറുകയിൽ ഒരു സ്നേഹ ചുംബനം കൊതിക്കുന്ന
കൊഞ്ചിച്ചിരിക്കാനും ചിണുങ്ങിക്കരയാനും
കുസൃതികൾ കാട്ടാനും മറന്നുപോയൊരാ
അനാഥത്വത്തിൻ കരിനിരൽ പതിച്ചൊരാ
കുരുന്നുകളുടെ അരികിലേക്കായി
അവരുടെ അമ്മയായി അച്ഛനായി
കുസൃതികൾ കാട്ടുന്നൊരാ കൂടപ്പിറപ്പായി
എന്തിനും പോന്നൊരാ ചങ്ങാതിയായി
ഉപദേശിയായി വഴികാട്ടുന്നൊരാ ഗുരുനാഥനായി
പോകണം എനിക്ക് യാത്രകൾ
മണ്ണോട് മണ്ണാകുന്നതിൻ മുൻപായി
ആരും കേൾക്കാതെ പോയരാ
മനസിനെ കേൾക്കുവാൻ
ആരും കാണാതെ പോയൊരാ
സൗന്ദര്യത്തെ കാണുവാൻ
അൽപ്പനേരത്തിലേറെയാ
താളം തെറ്റിയ മനസിന്റെ
താളത്തിനൊത്തൊന്നു കൂടെ നടക്കുവാൻ
പോകണം എനിക്ക് യാത്രകൾ
മണ്ണോട് മണ്ണാകുന്നതിൻ മുമ്പായി
പ്രതീക്ഷയുടെ നിലവിളക്കിൽ
തിരി തെളിയിക്കുവാനായി
ആകാംക്ഷയുടെ നിറമിഴികളുമായി
കാത്തിരിക്കുന്നൊരാ
എന്റെ രക്ഷിതാക്കളുടെ അരികിലേക്ക്
ഒരു ചെറുതിരി നാളമായി ചെന്നവർതൻ
പ്രതീക്ഷയുടെ നിലവിളക്കുകൊളുത്തേണം
ആ തിരിനാളം കെടാതവരിലൊരു
കെടാവിളക്കായി മാറേണം
പോകണം എനിക്ക് യാത്രകൾ
മണ്ണോട് മണ്ണാകുന്നതിൻ മുൻപായി
അല്ലലറിയാതെ വളരുന്നോരെൻ മക്കളെയും
പുതിയൊരു തലമുറയേയും എത്തിക്കണം
കാണാത്ത കാഴ്ചകൾ കണ്ടു പഠിക്കുവാൻ
പോകണം എനിക്ക് യാത്രകൾ
നിരാലംബരുടെ അരികിലേക്ക്
അവശതകളിലെ ആവശ്യങ്ങളിലേക്ക്
വഴിയോരത്തെ ദയനീയ കാഴ്ചകളിലേക്ക്
ഇനിയും ഏറെ ദൂരങ്ങളിൽ ചെന്നെത്തണം
എന്റെ കരളിലെ കാരുണ്യത്തിൻ തിരിനാളം
മണ്ണിലലിഞ്ഞണയും വരെ
പോകണം എനിക്ക് യാത്രകൾ