ഉത്തര്പ്രദേശിലെ വാരാണസിയില് ഒരു കുടുംബം ഡയപ്പറുകള് സംസ്കരിക്കാതെ അടുത്ത വീട്ടിലേക്ക് വലിച്ചെറിയുന്ന ദൃശ്യങ്ങള് സമൂഹമാധ്യമത്തില് വൈറലാവുകയാണ്. ഉപയോഗിച്ച ഡയപ്പറുകൾ കൊണ്ട് നിറഞ്ഞ ഒരു മരമാണ് വീഡിയോയിൽ. ഇൻഫ്ലുവൻസർ ശ്വേത കതാരിയയാണ് ഈ വീഡിയോ ഇൻസ്റ്റാഗ്രമിലൂടെ പങ്കുവയ്ക്കുകയായിരുന്നു.
ഒരു വലിയ രണ്ട് നില വീട് കാണിച്ചുകൊണ്ടാണ് വീഡിയോ തുടങ്ങുന്നത്. ആ വീടിന്റെ പുറത്തായി നിറയെ ചില്ലകളുള്ള വലിയൊരു മരവുമുണ്ട്. മരത്തിൽ നിറയെ ഉപയോഗിച്ച ശേഷം വലിച്ചെറിഞ്ഞ ഡയപ്പറുകൾ തൂങ്ങിക്കിടക്കുന്നതാണ് കാണുന്നത്. ഇലകളെക്കാൾ കൂടുതൽ ഡയപ്പറുകളാണ് മരത്തിലുള്ളത്. അച്ഛനും അമ്മയും ഒരു ചെറിയ കുട്ടിയും അടങ്ങുന്ന കുടുംബമാണ് ഈ വീട്ടിൽ താമസിക്കുന്നത് എന്നും വീഡിയോയിൽ പറയുന്നത് കേൾക്കാം. മാത്രമല്ല, ആ വീടിന് സമീപത്തായി ഒഴിഞ്ഞു കിടക്കുന്ന പറമ്പിലേക്ക് വീട്ടിലുള്ളവർ മാലിന്യം വലിച്ചെറിയാറുണ്ട് എന്നും വീഡിയോയിൽ പറയുന്നു.
വീണ്ടും ഉപയോഗിക്കാനാവുന്ന തരത്തിലുള്ള ക്ലോത്ത് ഡയപ്പറുകൾ ഉപയോഗിക്കാൻ മാതാപിതാക്കളെ പ്രോത്സാഹിപ്പിച്ചു കൊണ്ടാണ് ശ്വേതയുടെ വീഡിയോ അവസാനിക്കുന്നത്. നിരവധിപേരാണ് വീഡിയോക്കെതിരെ രംഗത്തെത്തിയിരിക്കുന്നത്. പരിസ്ഥിതി സ്നേഹികളടക്കമുള്ളവരും വിമര്ശനവുമായി എത്തിയിരുന്നു.