ടി20 ക്രിക്കറ്റ് ലോകകപ്പില്‍ സൂപ്പര്‍ 8 ഉറപ്പിക്കാനിറങ്ങിയ ഇന്ത്യക്ക് 111 റണ്‍സ് വിജയലക്ഷ്യം. ടോസ് നഷ്ടപ്പെട്ട് ആദ്യം ബാറ്റിങ്ങിനിറങ്ങിയ ആതിഥേയരായ യുഎസ് നിശ്ചിത ഓവറില്‍ എട്ട് വിക്കറ്റ് നഷ്ടത്തില്‍ 110 റണ്‍സെടുത്തു. നാലോവറില്‍ ഒമ്പത് റണ്‍സ് മാത്രം വഴങ്ങി നാലു വിക്കറ്റോടെ അര്‍ഷ്ദീപ് സിങ് തിളങ്ങി. ആദ്യ രണ്ട് മത്സരങ്ങളിലേതുപോലെ മാറ്റമില്ലാതെ ടീമിറങ്ങിയപ്പോള്‍ മലയാളി താരം സഞ്ജു സാംസണ്‍ വീണ്ടും പുറത്തായി.
യുഎസിന് ഇന്നിങ്‌സിന്റെ ആദ്യ പന്തില്‍ തന്നെ പിഴച്ചു. മൊണാങ്ക് പട്ടേലിന് പകരം ടീമിലെത്തിയ ഷയാന്‍ ജഹാംഗീര്‍ (0) ആദ്യ പന്തില്‍ തന്നെ അര്‍ഷ്ദീപിനു മുന്നില്‍ വീണു. പിന്നാലെ അതേ ഓവറിലെ ആറാം പന്തില്‍ ആന്‍ഡ്രിസ് ഗോസിനെയും (2) വീഴ്ത്തിയ അര്‍ഷ്ദീപ് ഇന്ത്യക്ക് മികച്ച തുടക്കം സമ്മാനിച്ചു. പിന്നീട് ആരോണ്‍ ജോണ്‍സിനെ (22 പന്തില്‍ 11) മടക്കി ഹാര്‍ദിക് പാണ്ഡ്യയും യുഎസിനെ പ്രതിരോധത്തിലാക്കി. 23 പന്തില്‍ 27 റണ്‍സെടുത്ത നിതീഷ് കുമാറാണ് യുഎസിന്റെ ടോപ് സ്കോററായത്. കോറി ആര്‍ഡേഴ്‌സണ്‍ 12 പന്തില്‍ 14 റണ്‍സെടുത്തു. ഹര്‍മീത് സിങ് 10 പന്തില്‍ നിന്ന് 10 റണ്‍സ് നേടി.
English Summary:India target 111 runs to secure Super 8
You may also like this video
