ഏഷ്യന്‍ ഗെയിംസിനുള്ള 17 അംഗ ടീമിനെ എഐഎഫ്‌എഫ് പ്രഖ്യാപിച്ചു. സീനിയര്‍ താരമായ സുനില്‍ ഛേത്രി ടീമിനെ നയിക്കും. മലയാളി താരം കെ പി രാഹുലും ഇടം നേടി. ധീരജ് സിങ്, റഹീം അലി, വിൻസി ബരേറ്റോ എന്നിവരാണ് ടീമിലെ മറ്റ് ശ്രദ്ധേയ താരങ്ങൾ. ആദ്യപട്ടികയിലുണ്ടായിരുന്ന സന്ദേശ് ജിങ്കനും ഗുര്‍പ്രീത് സിങ് സന്ധുവും ടീമിലില്ല. ഈ മാസം 23 മുതല്‍ ഒക്ടോബര്‍ എട്ട് വരെ ചൈനയിലെ ഹാങ്ഷുവിലാണ് പോരാട്ടം.
ടീമില്‍ 24 വയസിന് മുകളിലുള്ള ഏക താരം നായകന്‍ ഛേത്രി മാത്രമാണ്. ഐഎസ്‌എല്‍, ഐ ലീഗ് ക്ലബ്ബുകള്‍ താരങ്ങളെ വിട്ടുകൊടുക്കാന്‍ വിസമ്മതിക്കുന്നതായി റിപ്പോര്‍ട്ടുകളുണ്ടായിരുന്നു. ഇതോടെ ടീം തിരഞ്ഞെടുപ്പ് ആശങ്കയിലായി. ഒടുവില്‍ ഇക്കാര്യത്തില്‍ സമവായം വന്നതോടെയാണ് ടീം ചിത്രം തെളിഞ്ഞത്. 19 മുതലാണ് ഏഷ്യൻ ഗെയിംസ് ഫുട്ബോൾ മത്സരങ്ങൾ ആരംഭിക്കുന്നത്. 16ന് ടീം പുറപ്പെടണം. ഗു‍ർപ്രീതും ജിങ്കാനും ഉൾപ്പെടെയുള്ള സീനിയർ താരങ്ങളെ വിട്ടുകിട്ടാൻ ഫെഡറേഷൻ പരമാവധി ശ്രമിച്ചെങ്കിലും ക്ലബ്ബുകൾ വഴങ്ങാത്ത സാഹചര്യത്തിലാണ് ഛേത്രിയുടെ നേതൃത്വത്തിൽ ജൂനിയർ താരങ്ങളെ ഉൾപ്പെടുത്തി ടീം പ്രഖ്യാപിച്ചത്.
റാങ്കിങ്ങിലെ പോരായ്മ ചൂണ്ടിക്കാട്ടി ഇന്ത്യന്‍ ഒളിമ്പിക്സ് അസോസിയേഷന്‍ ഫുട്ബോള് പുരുഷ, വനിതാ ടീമുകളെ ഏഷ്യന്‍ ഗെയിംസില്‍ പങ്കെടുക്കാന്‍ അനുവദിച്ചിരുന്നില്ല. പിന്നീട് പരിശീലകന്‍ ഇഗോര്‍ സ്റ്റിമാചും എഐഎഫ്‌എഫും കായിക മന്ത്രാലയത്തിന് പ്രത്യേക അപേക്ഷ നല്‍കി. ഇതോടെയാണ് ടീമുകള്‍ക്കുള്ള വഴി തുറന്നത്. ഈ മാസം 19ന് ചൈനയ്ക്കെതിരാണ് ഏഷ്യൻ ഗെയിംസിലെ ഇന്ത്യയുടെ ആദ്യ മത്സരം. ഇതോടെ ഐഎസ്എൽ ഉദ്ഘാടന മത്സരത്തിന് ഛേത്രിയും രാഹുലും ഉണ്ടാവില്ല. 21ന് കൊച്ചിയിലാണ് കേരള ബ്ലാസ്റ്റേഴ്സും ബംഗളൂരു എഫ്‌‌സിയും തമ്മിലുള്ള ഉദ്ഘാടന മത്സരം.
English Summary: Indian Football Team for foot Announced
You may also like this video
