വിദ്യാർത്ഥികൾ തമ്മിലുള്ള വഴക്കിനിടെ ഓസ്‌ട്രേലിയയിൽ ഇന്ത്യൻ സ്വദേശിയായ എംടെക് വിദ്യാർത്ഥി കുത്തേറ്റു മരിച്ചു. ഹരിയാന സ്വദേശിയായ നവജീത് സന്ധു (22) ആണ് മരിച്ചത്. മെൽബണിൽ പ്രാദേശിക സമയം ശനിയാഴ്ച രാത്രി 9 മണിയോടെ നടന്ന സംഭവത്തിൽ ഒരു വിദ്യാർത്ഥിക്ക് പരിക്കേറ്റതായി മരിച്ച കുട്ടിയുടെ ബന്ധു പറഞ്ഞു.
വാടകയെച്ചൊല്ലി ഇന്ത്യൻ വിദ്യാർത്ഥികൾക്കിടയില്‍ തർക്കമുണ്ടായതായും ഇടപെടാൻ ശ്രമിച്ച നവജീത് സന്ധുവിനെ മറ്റൊരു വിദ്യാർത്ഥി കത്തികൊണ്ട് മാരകമായി ആക്രമിക്കുകയുമായിരുന്നുവെന്ന് റിപ്പോര്‍ട്ടുകള്‍ വ്യക്തമാക്കി. ജൂലൈയിൽ അവധിക്കാലം ആഘോഷിക്കാൻ നാട്ടിലേക്ക് മടങ്ങാനിരിക്കവെയാണ് നവനീത് കൊല്ലപ്പെട്ടതെന്ന് ബന്ധു കൂട്ടിച്ചേര്‍ത്തു.
ഒന്നര വർഷം മുമ്പ് എജ്യൂക്കേഷൻ വിസയിൽ ഓസ്ട്രേലിയയിലേക്ക് പോയതാണ് നവനീത്. കർഷകനായ പിതാവ് തന്റെ ഒന്നര ഏക്കർ ഭൂമി വിറ്റാണ് നവനീതിനെ പഠിക്കാൻ ഓസ്ട്രേലിയയിലേക്ക് അയച്ചത്.
മൃതദേഹം നാട്ടിലെത്തിക്കുന്നതിനുള്ള നടപടികള്‍ പുരോഗമിക്കുന്നതായി അധികൃതര്‍ അറിയിച്ചു.
English Summary: Indian Student stabbed to death by classmates in Australia
You may also like this video
