ഏറെ പ്രതീക്ഷയോടെ കാത്തിരിക്കുന്ന ഇന്ത്യൻ ചിത്രം ‘ജനനായകൻ’ ഉടൻ റിലീസ് ചെയ്യില്ലെന്ന് ഉറപ്പായതോടെ അഡ്വാൻസ് ടിക്കറ്റുകൾ അസാധുവാക്കി കാനഡയിലെ യോർക്ക് സിനിമാസ്. ചിത്രം ഏപ്രിൽ 30ന് മുമ്പ് റിലീസ് ചെയ്യാൻ സാധ്യതയില്ലെന്നാണ് തിയേറ്റർ അധികൃതർ അറിയിച്ചിരിക്കുന്നത്. ബുക്ക് ചെയ്ത ടിക്കറ്റുകളുടെ തുക എത്രയും വേഗം കൈപ്പറ്റണമെന്ന് സോഷ്യൽ മീഡിയ വഴി ഉപഭോക്താക്കൾക്ക് നിർദ്ദേശം നൽകി.
നേരത്തെ 89.99 കനേഡിയൻ ഡോളർ നൽകി വിഐപി അംഗത്വമെടുത്തവർക്ക് സിനിമയുടെ പുതിയ റിലീസ് തീയതി പ്രഖ്യാപിക്കുമ്പോൾ മുൻഗണന ലഭിക്കുമെന്ന് അധികൃതർ വ്യക്തമാക്കി. ഫസ്റ്റ് ഡേ ഫസ്റ്റ് ഷോ ഉറപ്പാക്കുന്നതിനായി വിഐപി അംഗങ്ങൾക്ക് നിലവിലെ ടിക്കറ്റുകൾ നിലനിർത്താൻ സൗകര്യമുണ്ടെങ്കിലും മറ്റുള്ളവർ റീഫണ്ട് നടപടികളുമായി മുന്നോട്ട് പോകാനാണ് തിയേറ്റർ ആവശ്യപ്പെട്ടിരിക്കുന്നത്.