ആന ഒരു വന്യജീവിയാണ്
ബ്ലാക്ക് ബോർഡിൽ ആനയെ
വരച്ചുകൊണ്ട് മാഷ് പറഞ്ഞു
കുട്ടികൾ ആനപ്പടത്തിലേക്ക്
നോക്കിയിരുന്നു
ഇപ്പോൾ ബ്ലാക്ക്ബോർഡ്
ഇരുണ്ട ഒരു കാട്,
ഒരു വലിയ ആന
തിങ്ങിയ മരനിഴലുകളുടെ കൂട്ടം
ആഴത്തിലേക്ക് കണ്ണെറിഞ്ഞാൽ
കാടിറങ്ങി വരുന്നു
കടുവ, കുറുക്കൻ, കാട്ടുപന്നി
ഒരുവൾ ആശങ്കയോടെ
കാട്ടിലേക്ക് പിന്നെയും നോക്കുന്നു
കാട്ടുതേൻ തേടിപോം
അച്ഛൻ തിരിച്ചെത്തിയോ?
ഈറ്റവെട്ടി അമ്മ കുടിയിലെത്തിയോ?
ബ്ലാക്ക് ബോർഡ് ഇരുണ്ട് ഇരുണ്ട്
അവളുടെ കണ്ണിൽ കലങ്ങുന്നു
ബോർഡിലെ ആനച്ചിത്രം
അത്കണ്ട് മാഷ് മായ്ക്കുന്നു
ഇപ്പോൾ ബ്ലാക്ബോഡിൽ
ഇരുട്ട് മാത്രം
മടങ്ങിപോവുന്ന
ഒരാനയുടെ പിൻഭാഗം മാത്രം
അരക്ഷിതാവസ്ഥ
ഇരുണ്ട ഒരേകാന്തത
മാഷിന് ഇനി വീട് വരച്ചേ ഒക്കൂ
കൂട്ടമണിയടിക്കാൻ
പീയൂണ് ഒരുങ്ങി തുടങ്ങി
മാഷ് വീട് വരയ്ക്കുന്നു
അവൾക്ക് സമാധാനത്തിനായി
അമ്മയെ, അച്ഛനെ വരയ്ക്കുന്നു
ഒരാനയെ മായ്ച്ചാലും
ഇരുണ്ട ഒരു കാടിനെ
പിന്നിൽ നിർത്തി
ഈ വീട്ടിൽ ഞങ്ങൾ
ഉറങ്ങുന്നതെങ്ങനെയെന്ന
ഒരു ചോദ്യം ക്ലാസിൽ മുഴങ്ങുന്നു
കൂട്ടമണി മുഴങ്ങുന്നു
കുട്ടികൾ ക്ലാസ് വിട്ടോടുന്നു
ഇപ്പോൾ ബ്ലാക്ക് ബോർഡ്
കൊമ്പ്കുലുക്കി
ബെഞ്ചും ഡെസ്കും
കുത്തിമറിച്ചിടുന്നു
ആന ഒരു വന്യജീവിയാണ്
![](https://janayugomonline.com/wp-content/uploads/2023/06/elephant.jpg)