ഗുജറാത്തിലെ മെഹ്സാനയിൽ പൊലീസ് അനുമതിയില്ലാതെ റാലി നടത്തിയെന്നാരോപിച്ച് ജിഗ്നേഷ് മേവാനിയടക്കം ഒൻപതുപേർക്ക് മൂന്നുമാസം തടവ് ശിക്ഷ. മെഹ്സാന മജിസ്ട്രേട്ട് കോടതിയാണ് ശിക്ഷ വിധിച്ചത്.
2017 ജൂലൈയിൽ പൊലീസ് അനുമതിയില്ലാതെ റാലി നടത്തിയതിന്റെ പേരിൽ രജിസ്റ്റർ ചെയ്ത ക്രിമിനൽ കേസിലാണ് ശിക്ഷ. എൻസിപി നേതാവ് രേഷ്മ പട്ടേലും തടവ് ശിക്ഷ ലഭിച്ചവരിൽ ഉൾപ്പെടുന്നു.
റാലി നടത്തുന്നത് തെറ്റല്ല എങ്കിലും അനുമതിയില്ലാതെ റാലി നടത്തുന്നത് തെറ്റാണെന്നാണ് അഡീഷണൽ ചീഫ് ജുഡീഷ്യൽ മജിസ്ട്രേറ്റ് ചൂണ്ടിക്കാട്ടുന്നത്. നിയമലംഘനം പൊറുക്കാനാവില്ലെന്നും കോടതി പറഞ്ഞു.
ഉനയിൽ ദളിത് വിഭാഗത്തിൽപ്പെട്ട ചിലരെ ആൾക്കൂട്ടം മർദ്ദിച്ച സംഭവത്തിന്റെ ഒന്നാം വാർഷിക ദിനത്തിൽ മെഹ്സാനയിൽ മേവാനിയും സംഘവും നടത്തിയ റാലിയാണ് കേസിന് കാരണമായത്. മേവാനിയുടെ സഹപ്രവർത്തകനായ ഒരാൾ രാഷ്ട്രീയ ദളിത് അധികാർ മഞ്ച് എന്ന സംഘടനയ്ക്കുവേണ്ടി റാലി നടത്താൻ അനുമതി തേടിയിരുന്നു.
മേവാനി അടക്കമുള്ളവർക്കെതിരെ മെഹ്സാന പോലീസാണ് അനധികൃതമായി കൂട്ടംകൂടിയതിന് കേസെടുത്തത്. 12 പേർക്കെതിരെ കുറ്റപത്രം സമർപ്പിച്ചിരുന്നു. ജെഎൻയു വിദ്യാർത്ഥി യൂണിയൻ മുൻ പ്രസിഡന്റ് കനയ്യ കുമാർ അടക്കമുള്ളവർ റാലിയിൽ പങ്കെടുത്തിരുന്നു.
English summary; Jignesh Mewani sentenced to three months in jail
You may also like this video;
