കാഴ്ച

നിന്റെ സമുദ്രം നിറഞ്ഞു
തൂവാതിരിക്കാൻ
ഞാനെന്റെ പുഴയെ
മുറുക്കിയടച്ചു
പച്ചമണം വല്ലാതെ
പൊഴിയുന്നിടത്തു വച്ച്
ഞാനെന്റെ ശാഖകൾ
മുറിച്ചു മാറ്റി
എന്റെ മഴവിൽ ചിറകുകൾ
നിന്റെ ഉയരത്തിലേയ്ക്ക് മാത്രം
പറന്നു നിറഞ്ഞു
നക്ഷത്ര വിരിപ്പിൽ നിന്റെ
വിരൽതുമ്പു മാത്രം തൊട്ടുവച്ചു
കടൽ കരയെ കൂടെ ചേർക്കും പോലെ
ഞാൻ നിന്നെ ചേർത്തുപിടിച്ചു
ഈ ഭൂമിയിലെ നിറങ്ങളെല്ലാം
നിന്നോട് ചേർത്തു
നിന്റെ മാത്രം ലോകത്തിലേയ്ക്ക്
ഞാനെന്നെ വരച്ചു ചേർത്തു
കോർത്തു നിറച്ച പ്രണയ മണികൾ
തൂവാതിരിക്കാൻ തുഞ്ചത്ത്
ഹൃദയത്തെ കൊളുത്തി വിട്ടു
ഭൂമിയുടെ അറ്റംവരെയും
ഒരുമിച്ചു നടക്കാൻ
വഴിയെല്ലാം വെളിച്ചം നിറച്ചു
പുതുമണം പൊഴിക്കാൻ
വാക്കുകളിൽ പൂക്കൾ വിരിച്ചു
നനുത്ത മണമുള്ള പുതിയ
ഉടുപ്പുകൾ തുന്നിവച്ചു
ഞാൻ നിന്നെ തിരയുമ്പോൾ
ഓർമ്മപെരുത്ത മഞ്ഞ
പൂക്കൾ വല്ലാതെ
പൊഴിയുന്നു