നടിയെ ആക്രമിച്ച കേസിൽ കാവ്യാ മാധവനെ വീണ്ടും ചോദ്യം ചെയ്യും. കാവ്യ ഇന്നലെ നൽകിയ മൊഴി തൃപ്തികരമല്ലെന്ന് വിലയിരുത്തിയാണ് ക്രൈം ബ്രാഞ്ചിന്റെ തീരുമാനം. ഇന്നലത്തെ ചോദ്യം ചെയ്യലിൽ തനിയ്ക്കെതിരായ ആരോപണങ്ങൾ കാവ്യ നിഷേധിച്ചിരുന്നു. മൊഴി വിശദമായി പരിശോധിച്ച ശേഷം വീണ്ടും ചോദ്യം ചെയ്യലിന് ഹാജരാകാൻ നിർദ്ദേശിച്ച് കാവ്യയ്ക്ക് ഉടൻ നോട്ടീസ് നൽകിയേക്കും.
ദിലീപും കാവ്യാ മാധവനും താമസിക്കുന്ന ആലുവയിലെ പത്മ സരോവരം വീട്ടിൽ വെച്ചാണ് ക്രൈം ബ്രാഞ്ച് കഴിഞ്ഞ ദിവസം കാവ്യയെ ചോദ്യം ചെയ്തത്. നാലര മണിക്കൂർ നീണ്ട ചോദ്യം ചെയ്യലിൽ തനിക്കെതിരായ ആരോപണങ്ങളെല്ലാം കാവ്യ നിഷേധിച്ചതായാണ് വിവരം. നടിയെ ആക്രമിച്ചതുമായി ബന്ധപ്പെട്ട ഗൂഢാലോചനയെക്കുറിച്ചോ വധ ഗൂഢാലോചനയെക്കുറിച്ചോ തനിയ്ക്ക് അറിവോ പങ്കോ ഇല്ലെന്ന് കാവ്യ അന്വേഷണ ഉദ്യോഗസ്ഥരെ അറിയിച്ചു.
കേസിൽ കാവ്യയുടെ പങ്കാളിത്തം സംശയിക്കത്തക്ക തരത്തിൽ, ദിലീപിന്റെ സഹോദരീ ഭർത്താവ് സുരാജിന്റേതെന്ന പേരിൽ പുറത്തു വന്ന ഓഡിയോ ക്ലിപ്പ് കാവ്യയെ കേൾപ്പിച്ചു. പക്ഷേ ശബ്ദരേഖയെക്കുറിച്ച് തനിക്കറിയില്ലെന്ന് കാവ്യ മൊഴി നൽകിയെന്നാണ് ക്രൈം ബ്രാഞ്ച് വൃത്തങ്ങൾ നൽകുന്ന സൂചന. മൊഴി പ്രാഥമികമായി വിലയിരുത്തിയ അന്വേഷണ സംഘം കാവ്യയെ വീണ്ടും ചോദ്യം ചെയ്യാൻ തീരുമാനിക്കുകയായിരുന്നു. മൊഴി വിശദമായി പരിശോധിച്ച ശേഷം പൊരുത്തക്കേടുകൾ കണ്ടെത്തിയാൽ, അത് സംബന്ധിച്ച് പ്രത്യേകം ചോദ്യാവലി തയ്യാറാക്കിയ ശേഷം കാവ്യയ്ക്ക് വീണ്ടും നോട്ടീസ് നൽകാനാണ് ക്രൈം ബ്രാഞ്ചിന്റെ തീരുമാനം.
English Summary:Kavya Madhavan will be questioned again
You may also like this video
