കുറുംകവിതകൾ

അച്ഛൻ
*******
വീണു പോയാലും എഴുന്നേറ്റു നിന്ന്
ജീവിത ഭാരം ചുമക്കുന്നത് കൊണ്ടാവാം
ഉമ്മറത്തെ ചാരു കസേര ഇന്നും
തുരുമ്പു പിടിക്കാതെ കിടക്കുന്നത്

അമ്മ
*******
എത്ര വൈകിയാലും നീ വന്നിട്ടേ കിടക്കൂ
എന്ന് അമ്മ പറയുന്നത് കൊണ്ടാവാം
വീട് എന്നും ഉറങ്ങാതെ കിടക്കുന്നത്

പെങ്ങൾ
*********
പുതിയൊരു ചെരിപ്പും കുടയും കൊടുത്ത്
മറ്റൊരാളുടെ കൈ പിടിച്ചു കൊടുത്തിട്ടും ഇപ്പോഴും
വരാറുണ്ട് അവൾ സങ്കടം പറഞ്ഞു
കരഞ്ഞു പറഞ്ഞു എന്റെ തോളിൽ ചായാനായി
അതുകൊണ്ടാവും ഞാനിപ്പോഴും സങ്കടം ഒറ്റ ചുമലിൽ ഒതുക്കിയത്

സുഹൃത്ത്
***********
എന്നും കൂട്ടിനുണ്ടാവും കൂടെ ഉണ്ടാവും
ഇടക്കിടക്കു സ്റ്റാറ്റസുകളിൽ
ഓർമ്മിപ്പിക്കുന്നത് കൊണ്ടാവാം ‘അവനിപ്പോൾ’
വഴിയിൽവച്ച് കണ്ടാലും മിണ്ടാതെ പോകുന്നത്

കാമുകി
********
കടലോളം സ്നേഹം കണ്ണീരായി
എന്റെ ചുമലിൽ ഒഴുക്കിയതുകൊണ്ടാവും
കവിത പോലെ അവൾ വേറെ
ഒരാൾക്ക് താലി ചാർത്താൻ നിന്നു കൊടുത്തത്