കുവൈറ്റിലെ തീപിടിത്തത്തിൽ മരിച്ചവരുടെ കുടുംബാംഗങ്ങൾക്കുള്ള നഷ്ടപരിഹാരം, ഇൻഷുറൻസ് എന്നിവ വേഗം ലഭിക്കാനുള്ള നടപടികൾ എത്രയും പെട്ടെന്ന് പൂർത്തീകരിക്കുമെന്ന് കുവൈത്ത് സർക്കാർ ഉറപ്പു നൽകിയതായി കേന്ദ്ര വിദേശകാര്യ സഹമന്ത്രി കീർത്തിവർധൻ സിങ്. ഇതിനായുള്ള രേഖകൾ വേഗം തയ്യാറാക്കുമെന്ന്‌ അറിയിച്ചിട്ടുണ്ടെന്നും അദ്ദേഹം പറഞ്ഞു.
ദുരന്തത്തെ വളരെ ഗൗരവകരമായാണ് കുവൈറ്റ് സർക്കാർ കാണുന്നത്. മരിച്ചവരെ തിരിച്ചറിയാനും എല്ലാവിധ പരിശോധനകളും നടത്തി കുറഞ്ഞ സമയത്തിനകം മൃതദേഹം വിട്ടുനൽകാൻ കുവൈറ്റ് സർക്കാർ എല്ലാ സഹായവും നൽകി. 25ഓളം ഇന്ത്യക്കാരാണ് ആശുപത്രിയിൽ ചികിത്സയിൽ കഴിയുന്നത് ഇവർക്കെല്ലാം മികച്ച ചികിത്സയാണ് നൽകുന്നതെന്നും കീർത്തിവർധൻ സിങ് പറഞ്ഞു.