വരാനിരിക്കുന്ന ഉംറ സീസണിന് മുന്നോടിയായി തീർത്ഥാടകരുടെ ആരോഗ്യ സുരക്ഷ ഉറപ്പാക്കുന്നതിനായി കുവൈറ്റ് ഇസ്ലാമിക കാര്യ മന്ത്രാലയം പുതിയ മാർഗ്ഗനിർദ്ദേശങ്ങൾ പുറപ്പെടുവിച്ചു. ഉംറ കർമ്മങ്ങൾക്കായി സൗദി അറേബ്യയിലേക്ക് പുറപ്പെടുന്ന എല്ലാ തീർത്ഥാടകരും നിർബന്ധമായും മെനിഞ്ചൈറ്റിസ് പ്രതിരോധ വാക്സിൻ എടുത്തിരിക്കണമെന്ന് മന്ത്രാലയം അറിയിച്ചു. യാത്രയ്ക്ക് മുൻപായി ഈ വാക്സിൻ സ്വീകരിക്കേണ്ടത് ഔദ്യോഗിക നടപടിക്രമങ്ങളുടെ ഭാഗമാണ്.
തീർത്ഥാടകർ തങ്ങൾ വാക്സിൻ സ്വീകരിച്ചുവെന്ന് തെളിയിക്കുന്ന വാക്സിനേഷൻ കാർഡോ അല്ലെങ്കിൽ ഒറിജിനൽ സർട്ടിഫിക്കറ്റോ യാത്രാ രേഖകൾക്കൊപ്പം ഹാജരാക്കേണ്ടത് നിർബന്ധമാണ്. വാക്സിനേഷൻ വിവരങ്ങൾ കുവൈറ്റ് സർക്കാരിന്റെ ഔദ്യോഗിക ഡിജിറ്റൽ പ്ലാറ്റ്ഫോമുകളായ ‘സഹൽ’ (Sahel) ആപ്പിലും ‘സലേം’ (Salem) പോർട്ടലിലും ലഭ്യമായിരിക്കും.
രാജ്യത്തെ എല്ലാ അംഗീകൃത പ്രതിരോധ ആരോഗ്യ കേന്ദ്രങ്ങളിലും (Preventive Health Centers) വാക്സിൻ ലഭ്യമാണെന്നും, റമദാൻ മാസത്തിൽ ഉംറ നിർവഹിക്കാൻ തയ്യാറെടുക്കുന്നവർ യാത്രാ തടസ്സങ്ങൾ ഒഴിവാക്കാൻ എത്രയും വേഗം വാക്സിനേഷൻ നടപടികൾ പൂർത്തിയാക്കണമെന്നും മന്ത്രാലയം വ്യക്തമാക്കി. കൂടുതൽ വിവരങ്ങൾക്കായി മന്ത്രാലയത്തിന്റെ ഔദ്യോഗിക വെബ്സൈറ്റായ www.awqaf.gov.kw സന്ദർശിക്കാവുന്നതാണ്.