മഹാശിവരാത്രി പ്രമാണിച്ച് ഫെബ്രുവരി 15ന് ബംഗളൂരു നഗരപരിധിയിൽ ഇറച്ചി വില്പനയ്ക്കും മൃഗങ്ങളെ കശാപ്പ് ചെയ്യുന്നതിനും നിരോധനം ഏർപ്പെടുത്തി ഗ്രേറ്റർ ബംഗളൂരു അതോറിറ്റി. അന്ന് നഗരസഭാ പരിധിയിലുള്ള എല്ലാ ഇറച്ചി വില്പനശാലകളും നിർബന്ധമായും അടച്ചിടണമെന്ന് മൃഗസംരക്ഷണ വകുപ്പ് ഡെപ്യൂട്ടി ഡയറക്ടർ പുറത്തിറക്കിയ ഉത്തരവിൽ വ്യക്തമാക്കുന്നു.
ഫെബ്രുവരി 15 ഞായറാഴ്ച ദിവസം മുഴുവൻ ഈ നിയന്ത്രണം നിലവിലുണ്ടാകും. ഉത്തരവ് കർശനമായി പാലിക്കാൻ കശാപ്പുകാരോടും ഇറച്ചി വ്യാപാരികളോടും അതോറിറ്റി ആവശ്യപ്പെട്ടിട്ടുണ്ട്. പൊതുജനങ്ങൾ നിയന്ത്രണങ്ങളോട് സഹകരിക്കണമെന്നും അധികൃതർ അഭ്യർത്ഥിച്ചു. എല്ലാ വർഷവും ശിവരാത്രി ദിനത്തിൽ ബെംഗളൂരുവിൽ ഇത്തരം നിയന്ത്രണങ്ങൾ ഏർപ്പെടുത്താറുണ്ട്.