ഒഡിഷയിലെ കട്ടക്കില്‍ മകര സംക്രാന്തി മേളയ്ക്കിടെ തിക്കിലും തിരക്കിലും പെട്ട് രണ്ട് പേര്‍ മരിച്ചു. സ്ത്രീകളും കുട്ടികളും ഉള്‍പ്പെടെ 20ലധികം പേര്‍ക്ക് പരിക്കേറ്റിട്ടുണ്ട്. ഇവരില്‍ പലരുടെയും നില ഗുരുതരമാണ്. മഹാനദിക്ക് കുറുകെയുള്ള ഗോപിനാഥ്പൂര്‍— ബദാംബ ടി-പാലത്തിലാണ് അപകടം ഉണ്ടായത്.
മകരസംക്രാന്തി മേളയോട് അനുബന്ധിച്ച് 3.4 കിലോമീറ്റര്‍ നീളമുള്ള പാലത്തില്‍ രണ്ട് ലക്ഷത്തിലധികം ഭക്തര്‍ ഒത്തുകൂടിയിരുന്നതായി അധികൃതർ പറഞ്ഞു. പരിക്കേറ്റവരെ സമീപത്തെ ആശുപത്രികളിലേക്ക് മാറ്റിയതായി കട്ടക് മെഡിക്കല്‍ കോളജിലെ ഡോ. രഞ്ജന്‍ ബാരിക് പറഞ്ഞു.
ഒഡിഷയിലെ ഏറ്റവും വലിയ പാലമാണ് ഗോപിനാഥ്പൂര്‍— ബദാംബ. മഹാനദിയിലെ ദ്വീപ് പ്രദേശത്ത് സ്ഥിതി ചെയ്യുന്ന ക്ഷേത്രത്തില്‍ ദര്‍ശനം നടത്താന്‍ പോയവരാണ് അപകടത്തില്‍പ്പെട്ടത്. പ്രതീക്ഷിച്ചതിലും വലിയ തിരക്കാണ് പാലത്തില്‍ ഉണ്ടായിരുന്നതെന്നും പെട്ടന്ന് സ്ഥിതി നിയന്ത്രണാതീതമാവുകയായിരുന്നുവെന്നും അത്താഗഢ് സബ് കളക്ടര്‍ ഹേമന്ത് കുമാര്‍ സ്വയിന്‍ പറഞ്ഞു.
English Summary: Makara Sankramam: Two die in stampede in Odisha; Many people were injured
You may also like this video
