മണിപ്പൂരില്‍ ഭാഗികമായി ഇന്റര്‍നെറ്റ് വിലക്ക് നീക്കി ഹൈക്കോടതി. വംശീയ കലാപം രൂക്ഷമായ സംസ്ഥാനത്ത് കേബിളുകളും ഫൈബർ ഒപ്‌റ്റിക് കണക്ഷനുകളും എടുത്തിട്ടുള്ളവർക്ക് ഇന്റർനെറ്റ് സേവനം അനുവദിക്കാൻ മണിപ്പൂർ ഹൈക്കോടതി ബിരേൻ സിങ് സർക്കാരിനോട് ആവശ്യപ്പെട്ടു. വിദഗ്ധ സമിതി അനുശാസിച്ച രീതിയില്‍ ഫൈബര്‍ ടു ഹോം(എഫ്‌ടിഎച്ച്) കണക്ഷനുകള്‍ നല്‍കുന്നത് പരിഗണിക്കണമെന്നും കോടതി ഉത്തരവിട്ടു.
ഇന്റര്‍നെറ്റ് ലീസ് ലൈനിലൂടെ (ഐഎല്‍എല്‍) സെക്കൻഡില്‍ 10എംബി വേഗതയില്‍ ഇന്റര്‍നെറ്റ് അനുവദിക്കുന്നത് അനധികൃതമായി ഒന്നും ചെയ്യാൻ ഉപയോക്താക്കള്‍ക്ക് അവസരം നല്‍കില്ലെന്നും നിരീക്ഷിക്കാൻ അവസരമുണ്ടാകുമെന്നും വിദഗ്ധ കമ്മിറ്റി അഭിപ്രായപ്പെട്ടിരുന്നു. ഇന്റര്‍നെറ്റ് സേവനം പുനഃസ്ഥാപിക്കണമെന്നാവശ്യപ്പെട്ടുള്ള ഹര്‍ജി പരിഗണിക്കവെ ജസ്റ്റിസ് അഹൻതേം ബിമേല്‍ സിങ്, എ ഗുണേശ്വര്‍ ശര്‍മ്മ എന്നിവരുള്‍പ്പെട്ട ഡിവിഷൻ ബെഞ്ചാണ് വിധി പുറപ്പെടുവിച്ചത്. സംസ്ഥാനത്ത് രണ്ട് മാസത്തിലേറെയായി ഇന്റര്‍നെറ്റ് വിലക്ക് നിലനില്‍ക്കുന്നുണ്ട്.
യുഎസ് ഇടപെടല്‍: സിപിഐ അപലപിച്ചു
ന്യൂഡല്‍ഹി: മണിപ്പൂരിനെക്കുറിച്ചുള്ള യുഎസ് അംബാസിഡറുടെ അഭിപ്രായത്തെ സിപിഐ കേന്ദ്ര സെക്രട്ടേറിയറ്റ് അപലപിച്ചു. ജൂലൈ ഏഴിന് കൊൽക്കത്തയിൽ നടത്തിയ വാർത്താ സമ്മേളനത്തിൽ വടക്കു കിഴക്കൻ സംസ്ഥാനമായ മണിപ്പൂരിലെ അക്രമങ്ങൾ നേരിടാൻ ഇന്ത്യ ആവശ്യപ്പെട്ടാൽ സഹായിക്കുന്നതിന് തയ്യാറാണെന്നായിരുന്നു ഇന്ത്യയിലെ യുഎസ് അംബാസിഡർ എറിക് ഗാർസെറ്റി പറഞ്ഞിരുന്നത്. ഇന്ത്യയുടെ ആഭ്യന്തര കാര്യങ്ങളിലുള്ള ഇത്തരം ഇടപെടല്‍ നീക്കങ്ങളെ ശക്തമായി എതിർക്കുന്നുവെന്ന് സെക്രട്ടേറിയറ്റ് പ്രസ്താവനയില്‍ വ്യക്തമാക്കി.
English Summary: Manipur HC partially lifts internet ban in the state
You may also like this video
