മാന്നാർ മഹാത്മാ വള്ളംകളിക്കിടെ ചെറുതന ചുണ്ടന്റെ അമരക്കാരനെ അപായപ്പെടുത്താൻ പൊലീസ് ക്ലബ്ബ് ശ്രമിച്ചെന്ന പരാതിയിൽ റിപ്പോർട്ട് തേടി ആഭ്യന്തരവകുപ്പ്.
പൊലീസ് ബോട്ട്ക്ലബ്ബിന്റെ ചുമതലയുള്ള എആർ ക്യാമ്പ് ഡെപ്യുട്ടി കമാന്റന്റിനോടാണ് റിപ്പോർട്ട് ആവശ്യപ്പെട്ടിരിക്കുന്നത്. കഴിഞ്ഞ ദിവസമായിരുന്നു പമ്പാനദിയിൽ നടന്ന മഹാത്മാഗാന്ധി വള്ളംകളിയിൽ ചെറുതന ചുണ്ടനെ പൊലീസ് ക്ലബ്ബിന്റെ നിരണം ചുണ്ടൻ തോല്പിച്ചത്. മത്സരം തുടങ്ങിയപ്പോൾ തന്നെ പൊലീസ് ബോട്ട് ക്ലബ്ബ് അംഗങ്ങൾ തങ്ങളെ ഉപദ്രവിച്ച് തുടങ്ങിയതായി ചെറുതന ചുണ്ടനിലെ തുഴച്ചിലുകാർ പറയുന്നു.
പൊലീസ് ക്ലബ്ബിനെതിരെ ജില്ലാ കളക്ടർക്കും പൊലീസ് മേധാവിക്കും ഭാരവാഹികൾ പരാതി നൽകിയിട്ടുണ്ട്. നടപടിയുണ്ടായില്ലെങ്കിൽ മറ്റ് നടപടികളിലേക്ക് കടക്കും. മത്സരഫലം റദ്ദാക്കാൻ ഹൈക്കോടതിയെ സമീപിച്ചു കഴിഞ്ഞുവെന്നും ഇവർ വ്യക്തമാക്കി. എന്നാൽ നിരണം ചുണ്ടന്റെ മൂന്നാം ട്രാക്കിലേക്ക് ചെറുതന ചുണ്ടൻ കടന്നുകയറിയെന്നാണ് പൊലീസിന്റെ വിശദീകരണം. മുന്നോട്ട് തുഴഞ്ഞ് പോകാൻ തടസം സൃഷ്ടിച്ചു. സ്വാഭാവികമായി സംഭവിച്ച കാര്യങ്ങളാണ് പിന്നീട് നടന്നത്.
ചെറുതനയുടെ തുഴച്ചിലുകാരുടെ ആക്രമണത്തിൽ രണ്ട് പൊലീസുകാർക്ക് പരിക്ക് സംഭവിച്ചെന്നും ഡ്രോൺ ദൃശ്യങ്ങൾ പരിശോധിച്ചാൽ ഇക്കാര്യങ്ങൾ വ്യക്തമാകുമെന്നും പൊലീസ് വിശദീകരിക്കുന്നു. ഇക്കാര്യങ്ങൾ തന്നെയാണ് റിപ്പോർട്ടിൽ വ്യക്തമാക്കുകയെന്ന് എആർ ക്യാമ്പ് ഡെപ്യൂട്ടി കമാന്റന്റ് മാധ്യമങ്ങളോട് വിശദീകരിച്ചു.
English Summary: Mannar Boat Festival issue; The Home Department has sought a report
You may like this video also
