രാമക്ഷേത്ര ഉദ്ഘാടനത്തോടനുബന്ധിച്ച് മുഴുവന്‍ പൊതു സ്ഥാപനങ്ങള്‍ക്കും ഉച്ചവരെ അവധി പ്രഖ്യാപിച്ച കേന്ദ്ര സര്‍ക്കാര്‍ തീരുമാനത്തെ അപലപിച്ച് മൗലാന ആസാദ് നാഷണല്‍ ഉര്‍ദു സര്‍വകലാശാല യൂണിയന്‍.പൊതു സ്ഥാപനങ്ങളിലും സർവ്വകലാശാലകളിലും നുഴഞ്ഞുകയറാനും കാവിവത്കരിക്കാനുമുള്ള ശ്രമമാണ് കേന്ദ്ര സർക്കാരിന്റേതെന്ന് യൂണിയൻ പ്രസിഡന്റ്‌ മതീൻ അഷ്‌റഫ്‌ പറഞ്ഞു.ഇന്ത്യ അത്യധികം വിലമതിക്കുന്ന മതേതര മൂല്യങ്ങൾക്കെതിരെയുള്ള തിരിച്ചടി മാത്രമല്ല പുതിയ നീക്കം.
ഭരണഘടന ഉയർത്തിപ്പിടിക്കുന്ന ജനാധിപത്യ, മതേതര തത്വങ്ങളോടുള്ള ഭീഷണി കൂടിയാണ്. ആര്‍എസ എസ് പിന്തുണയോടെ ഇന്ത്യയെ ഹിന്ദുരാഷ്ട്രമാക്കി മാറ്റുവാൻ വേണ്ടി വിദ്യാഭ്യാസ സ്ഥാപനങ്ങൾക്ക് മേലുള്ള നിയന്ത്രണം ഏറ്റെടുക്കുന്നതെങ്ങനെയെന്നാണ് ഇവിടെ കാണുന്നത്.
മതപരമായ ആചാരങ്ങൾ അടിച്ചേൽപ്പിച്ചുകൊണ്ട് ഇന്ത്യ എന്ന ആശയത്തെ തന്നെ ഇല്ലാതാക്കുന്നതായും മതീൻ അഷ്‌റഫ്‌ പറഞ്ഞു.സ്വതന്ത്ര ചിന്ത, സ്വയംഭരണം, സഹിഷ്ണുത, ബഹുസ്വരത എന്നിവ വളർത്തിയെടുക്കുന്നതിലാണ് അക്കാദമിക സ്ഥാപനങ്ങളുടെ പവിത്രതയെന്നും അതിനെ ഹിന്ദുത്വ പ്രത്യയശാസ്ത്രങ്ങളുമായി കൂട്ടിക്കുഴക്കാനുള്ള ശ്രമങ്ങൾ സർവ്വകലാശാല എന്ന ആശയത്തിന് ഭീഷണിയാണെന്നും മതീൻ അഷ്‌റഫ്‌ പുറത്തുവിട്ട പ്രസ്താവനയിൽ പറയുന്നു.
ഇന്ത്യൻ മതേതരത്വത്തിന് ഭീഷണി ഉയർത്തുന്ന ശക്തികളെ പ്രതിരോധിക്കുന്നതിന്റെ ഭാഗമായി അധ്യാപകരോടും വിദ്യാർത്ഥികളോടും ജനുവരി 22ന് ക്ലാസുകൾ ബഹിഷ്കരിക്കുവാനും യൂണിയൻ ആഹ്വാനം ചെയ്തു.
English Summary:
Maulana Azad National Urdu University Union condemns decision to declare holiday for public institutions on the occasion of Ram Temple inauguration
You may also like this video:
