കോഴിക്കോട് മെഡിക്കല് കോളജ് ആശുപത്രിയില് ചികിത്സാപ്പിഴവിനെ തുടര്ന്ന് രോഗി മരിച്ചെന്ന് ആരോപണം. പേരാമ്പ്ര സ്വദേശിനി വിലാസിനി (57)യാണ് മരിച്ചത്. കഴിഞ്ഞ ചൊവ്വാഴ്ചയാണ് ഗര്ഭപാത്രം നീക്കംചെയ്യാനുള്ള ശസ്ത്രക്രിയക്കായി വിലാസിനിയെ ആശുപത്രിയില് പ്രവേശിപ്പിച്ചത്. വെള്ളിയാഴ്ചയാണ് ശസ്ത്രക്രിയ നടത്തിയത്. ശസ്ത്രക്രിയയിൽ കുടലിന് പരുക്ക് പറ്റിയിട്ടുണ്ടെന്ന് ഡോക്ടർമാർ പറഞ്ഞിരുന്നു. പിന്നീട് വാര്ഡിലേക്ക് മാറ്റിയ രോഗിയ്ക്ക് ഡോക്ടര്മാരുടെ നിര്ദ്ദേശപ്രകാരം കട്ടിയുള്ള ആഹാരം നല്കിയിരുന്നു. ഇതിന് ശേഷം വയറുവേദന അനുഭവപ്പെട്ടതോടെയാണ് ഐസിയുവിലേക്ക് മാറ്റിയത്.
യൂട്രസിന്റെ ഭാഗത്ത് അണുബാധ ഉള്ളതായി ഡോക്ടർമാർ സംശയിച്ചിരുന്നു. തുടർന്ന് വീണ്ടും ശസ്ത്രക്രിയ നടത്തി. കുടലില് മുറിവുണ്ടായ സ്ഥലത്താണ് അണുബാധയുണ്ടായത്. ഇതിനെത്തുടർന്ന് അണുബാധയുള്ള ഭാഗം മുറിച്ച് കളയുകയും ചെയ്തിരുന്നു. ശസ്ത്രക്രിയക്ക് ശേഷം രോഗിയുടെ ആരോഗ്യസ്ഥിതി മോശമാവുകയും വെന്റിലേറ്ററിലേക്ക് മാറ്റുകയും ചെയ്തു. അണുബാധ കിഡ്നിയിലേക്കും കരളിലേക്കും ഉള്പ്പടെ ബാധിക്കുകയായിരുന്നു. ഇന്ന് രാവിലെയാണ് വിലാസിനിയുടെ മരണം സ്ഥിരീകരിച്ചത്. ചികിത്സാപ്പിഴവുണ്ടായി എന്ന് കാണിച്ച് ബന്ധുക്കള് ആശുപത്രി സൂപ്രണ്ടിനും മെഡിക്കല് കോളജ് പൊലീസിലും പരാതി നല്കിയിട്ടുണ്ട്.