വാടക ഗര്‍ഭധാരണം സംബന്ധിച്ച വിവാദത്തില്‍ പ്രതികരണവുമായി തെന്നിന്ത്യന്‍ നടി നയന്‍താരയും ഭര്‍ത്താവ് വിഘ്നേഷ് ശിവനും. ആറ് വര്‍ഷങ്ങള്‍ക്ക് മുമ്പ് തന്നെ തങ്ങള്‍ വിവാഹിതരായെന്നും ഡിസംബറിൽ തന്നെ വാടകഗർഭധാരണ കരാർ നടപടികൾ പൂർത്തിയാക്കിയതിനാൽ നിയമലംഘനങ്ങളൊന്നും നടത്തിയിട്ടില്ലെന്നും ഇരുവരും തമിഴ്നാട് ആരോഗ്യവകുപ്പിന് നല്‍കിയ സത്യവാങ്മൂലത്തില്‍ പറയുന്നു.
ഈ ജൂണിലാണ് ഇരുവരും വിവാഹിതരായത്. വിപുലമായ ചടങ്ങുകളോടെ ഈ ജൂണ്‍ ഒമ്പതിന് ഇരുവരും വിവാഹിതരായിരുന്നു. തുടര്‍ന്ന് നാല് മാസത്തിന് ശേഷം വാടക ഗര്‍ഭധാരണം വഴി ഇരുവരും അച്ഛനും അമ്മയുമായെന്നുള്ള വാര്‍ത്ത പുറത്തുവന്നതോടെയാണ് നിയമലംഘന വിവാദം പൊട്ടിപ്പുറപ്പെട്ടത്.
വാടകഗർഭധാരണ (സറഗസി) ഭേദഗതി നിയമപ്രകാരമുള്ള വ്യവസ്ഥകൾ ലംഘിച്ചെന്നായിരുന്നു ആരോപണം. വിവാഹം കഴിഞ്ഞ് 5 വർഷത്തിനു ശേഷവും കുട്ടികൾ ഇല്ലെങ്കിൽ മാത്രമേ വാടകഗർഭധാരണം തിരഞ്ഞെടുക്കാവൂ എന്നതടക്കമുള്ള കർശന ചട്ടങ്ങൾ ലംഘിച്ചെന്ന വിവാദത്തെ തുടർന്ന് ആരോഗ്യവകുപ്പ് സമിതി അന്വേഷണം ആരംഭിക്കുകയായിരുന്നു. ഇക്കൊല്ലം നിലവിൽ വന്ന നിയമഭേദഗതി ജൂൺ 22നാണു വിജ്ഞാപനം ചെയ്തതും പ്രാബല്യത്തിലായതും.
English Summary: Nayanthara and Vignesh revealed that they got married six years ago
You may like this video also
