എപ്സ്റ്റീൻ ഫയലുകളിൽ ദലൈലാമയുടെ പേര് പരാമർശിക്കുന്നുണ്ടെന്ന പ്രചരണം തെറ്റാണെന്ന് ഓഫിസ്

ലൈംഗിക കുറ്റവാളി ജെഫ്രി എപ്സ്റ്റീനുമായി ബന്ധപ്പെട്ടു പുറത്തുവന്ന എപ്സ്റ്റീൻ ഫയലുകളിൽ ടിബറ്റൻ ആത്മീയ നേതാവ് ദലൈലാമയുടെ പേര് പരാമർശിക്കുന്നുണ്ടെന്ന മാധ്യമ റിപ്പോർട്ടിനെതിരെ നിഷേധക്കുറിപ്പുമായി ദലൈലാമയുടെ ഓഫിസ്. ലോകമെമ്പാടും ചർച്ചയാവുന്ന എപ്സ്റ്റീൻ ഫയലുകളിൽ 169 പ്രാവശ്യം ദലൈലാമയുടെ പേര് പരമാർശിക്കുന്നുണ്ടെന്നാണ് റിപ്പോർട്ടുകൾ. യുണൈറ്റഡ് സ്റ്റേറ്റ്സ് ഡിപ്പാർട്മെന്റ് ഓഫ് ജസ്റ്റിസ് പുറത്തുവിട്ട രേഖകളിലാണ് ഇതുള്ളത്.അതേസമയം പുറത്തുവരുന്ന മാധ്യമ റിപ്പോർട്ടുകൾ തെറ്റാണെന്നും ജെഫ്രി എപ്സ്റ്റീനെ ഒരിക്കലും ദലൈലാമ നേരിൽ കണ്ടിട്ടില്ലെന്നും അദ്ദേഹത്തിന്റെ ഓഫിസ് പുറത്തിറക്കിയ പ്രസ്താവനയിൽ പറയുന്നു. എപ്സ്റ്റീനുവേണ്ടി ആരും ദലൈലാമയുമായി കൂടിക്കാഴ്ച നടത്തിയിട്ടില്ലെന്നും ആശയവിനിമയം നടത്തിയിട്ടില്ലെന്നും പ്രസ്താവനയിൽ ആവർത്തിക്കുന്നുണ്ട്.