വിഖ്യാത ഹോളിവുഡ് നടിയും ഓസ്കാർ ജേതാവുമായ ഡയാൻ കീറ്റൺ(79) അന്തരിച്ചു. മരണകാരണം സംബന്ധിച്ച വിവരങ്ങൾ ഇതുവരെ പുറത്തുവിട്ടിട്ടില്ല. നേരത്തെ ബുളിമിയ(ഭക്ഷണ ക്രമക്കേടുമായി ബന്ധപ്പെട്ട രോഗം) എന്ന രോഗത്തോട് പോരാടിയതായി റിപ്പോർട്ടുകളുണ്ട്. അഞ്ച് പതിറ്റാണ്ട് നീണ്ട അഭിനയ ജീവിതത്തിൽ ഒട്ടേറെ ശ്രദ്ധേയമായ കഥാപാത്രങ്ങളെ അവർ അനശ്വരമാക്കി. 1977‑ൽ പുറത്തിറങ്ങിയ ‘ആനി ഹാൾ’ എന്ന ചിത്രത്തിലെ പ്രകടനത്തിനാണ് അവർക്ക് മികച്ച നടിക്കുള്ള ഓസ്കാർ ലഭിച്ചത്. കൂടാതെ, ലോകമെമ്പാടുമുള്ള സിനിമ ആസ്വാദകർ എന്നും ഓർക്കുന്ന ‘ദി ഗോഡ്ഫാദർ’ സിനിമകളിലെ ശ്രദ്ധേയ സാന്നിധ്യം കൂടിയായിരുന്നു ഡയാൻ കീറ്റൺ.
അവരുടെ കരിയറിലെ മറ്റ് ഹിറ്റ് ചിത്രങ്ങളിൽ ‘ദി ഫസ്റ്റ് വൈവ്സ് ക്ലബ്’, ‘സംതിംഗ്സ് ഗോട്ട ഗിവ്’, ‘ബുക്ക് ക്ലബ്’ എന്നിവ ഉൾപ്പെടുന്നു. കൂടാതെ, ‘റെഡ്സ്’, ‘സംതിംഗ്സ് ഗോട്ട ഗിവ്’, ‘മാർവിൻസ് റൂം’ എന്നീ ചിത്രങ്ങളിലെ അഭിനയത്തിനും അവർക്ക് ഓസ്കാർ നോമിനേഷനുകൾ ലഭിച്ചിട്ടുണ്ട്. ‘ഫാദർ ഓഫ് ദി ബ്രൈഡ്’, ‘ബേബി ബൂം’ തുടങ്ങിയവയാണ് അവരുടെ മറ്റ് പ്രധാന വേഷങ്ങൾ.