സെമിഫൈനലിന് മുമ്പ് പാകിസ്ഥാനെയും തോല്പിച്ച് ഇന്ത്യ ഏഷ്യൻ ചാമ്പ്യൻസ് ട്രോഫി ഹോക്കിയില്‍ അപരാജിത കുതിപ്പുമായി മുന്നോട്ട്. ഗ്രൂപ്പ്ഘട്ടത്തിലെ അവസാന മത്സരത്തില്‍ ഒന്നിനെതിരെ രണ്ട് ഗോളുകള്‍ക്കായിരുന്നു ഇന്ത്യ പാകിസ്ഥാനെ കീഴടക്കിയത്. ക്യാപ്റ്റൻ ഹർമൻപ്രീത് സിങ് വീണ്ടുംതിളങ്ങി. പെനാല്‍റ്റി കോർണറിലൂടെ ഇന്ത്യക്കായി രണ്ട് ഗോളുകളും ഹര്‍മന്‍പ്രീതാണ് നേടിയത്‌. ഗ്രൂപ്പ് ഘട്ടത്തില്‍ അഞ്ച് മത്സരങ്ങളും ജയിച്ചാണ് ഇന്ത്യയുടെ സെമി പ്രവേശനം. പരാജയം രുചിക്കാതെ അവസാന നാലിലെത്തിയ ഏക ടീമും ഇന്ത്യയാണ്.
ആദ്യ മത്സരത്തില്‍ ചൈനയെ എതിരില്ലാത്ത മൂന്ന് ഗോളിനായിരുന്നു തകർത്തത്. ശേഷം ജപ്പാനെ 5–1 എന്ന സ്കോറില്‍ കീഴടക്കി. മലേഷ്യക്കെതിരെ ഒന്നിനെതിരെ എട്ട് ഗോളുകള്‍ക്കായിരുന്നു ജയം. കൊറിയയെ 3–1നും പരാജയപ്പെടുത്തി.