സംസ്ഥാനത്ത് നാളെ സ്വകാര്യബസ് പണിമുടക്ക്

സംസ്ഥാനത്ത് നാളെ സ്വകാര്യബസ് സമരം. ഗതാഗത കമ്മീഷണറുമായി ബസുടമകൾ നടത്തിയ ചർച്ച പരാജയപ്പെട്ടതിനെ തുടർന്നാണ് സമരം പ്രഖ്യാപിച്ചത്. നാളെ രാവിലെ മുതൽ വൈകീട്ട് വരെയായിരിക്കും പണിമുടക്ക്. ബസ് നിരക്ക് വർധിപ്പിക്കുക, കാലങ്ങളായി മാറ്റമില്ലാതെ തുടരുന്ന വിദ്യാർത്ഥികളുടെ കൺസഷൻ നിരക്ക് വർധിപ്പിക്കുക, ബസുടമകളിൽ നിന്നും അമിതമായി പിഴ ഈടാക്കുന്ന നടപടി അവസാനിപ്പിക്കുക, പോലീസ് ക്ലിയറൻസ് സർട്ടിഫിക്കറ്റ് ഒഴിവാക്കുക എന്നീ ആവശ്യങ്ങൾ ഉന്നയിച്ചാണ് സ്വകാര്യ ബസ് വ്യവസായ സംരക്ഷണ സമിതി സമരം പ്രഖ്യാപിച്ചിരിക്കുന്നത്. അതേസമയം, സ്വകാര്യ ബസ് ജീവനക്കാർക്ക് പോലീസ് ക്ലിയറൻസ് സർട്ടിഫിക്കറ്റ് വേണമെന്ന നിലപാടിൽ നിന്ന് പിന്നോട്ടില്ലെന്ന് ഗതാഗത മന്ത്രി കെ ബി ഗണേഷ്കുമാർ വ്യക്തമാക്കി.
ഈ മാസം 22-ാം തീയതി മുതൽ ബസുടമകൾ അനിശ്ചിതകാല സമരത്തിലേക്ക് കടക്കുമെന്നും അറിയിച്ചിട്ടുണ്ട്.