ഫാസിസത്തിന്റെ വെറുപ്പും ആക്രമണോത്സുകതയും പരത്തുന്ന പ്രചാരവേലയ്ക്ക് വിധേയപ്പെടാത്തതിനെയെല്ലാം മുഖ്യധാരയിൽ നിന്നടർത്തിമാറ്റി നിഷേധാത്മകമായി രേഖപ്പെടുത്തുന്ന സ്ഥിതി വിശേഷം അത്യന്തം ആശാങ്കാജനകമാണെന്ന് നാടക — ചലച്ചിത്ര പ്രതിഭ നിലമ്പൂർ ആയിഷ.
ഇന്ത്യയിൽ ജനാധിപത്യം എന്നത് പ്രഹസനമായി മാറുകയാണ്. അധികാരം മാത്രം മുൻനിർത്തിക്കൊണ്ടുള്ള വർഗീയ ധ്രുവീകരണ അജണ്ടയിൽ നിന്നുടലെടുക്കുന്ന ജനാധിപത്യ വിരുദ്ധ ഏകീകരണം രാജ്യത്തിന്റെ ബഹുസ്വരതയെ കാർന്നുതിന്നുമ്പോൾ ജാഗ്രത പാലിക്കേണ്ടത് യുവജനങ്ങളാണെന്നും അവർ കൂട്ടിച്ചേർത്തു.
വയനാട് പാർലമെന്റ് മണ്ഡലം എൽഡിഎഫ് സ്ഥാനാർത്ഥി സത്യൻ മൊകേരിയുടെ തെരഞ്ഞെടുപ്പ് പ്രചരണാർത്ഥം എഐവൈഎഫ് സംഘടിപ്പിച്ച യുവകലാ ജാഥ ഉദ്ഘാടനം ചെയ്യുകയായിരുന്നു നിലമ്പൂര്‍ ആയിഷ. എഐവൈഎഫ് സംസ്ഥാന പ്രസിഡന്റ് എൻ അരുൺ അധ്യക്ഷത വഹിച്ചു. ഭക്ഷ്യ സിവിൽ സപ്ലൈസ് മന്ത്രി ജി ആർ അനിൽ, എഐവൈഎഫ് സംസ്ഥാന സെക്രട്ടറി ടി ടി ജിസ്‌മോൻ, ഇ ടി ടൈസൺ എംഎൽഎ, സിപിഐ മലപ്പുറം ജില്ലാ സെക്രട്ടറി പി കെ കൃഷ്ണദാസ്, സുഹൈബ് മൈലമ്പാറ, ആർ ജയകൃഷ്ണൻ എന്നിവർ സംസാരിച്ചു.